– Eg vurderer tilliten min til Kjerkol utifrå det arbeidet ho gjer som statsråd. Så er det ei sak knytt til hennar verksemd som student før ho kom i regjering. Dei spørsmåla må lærestaden hennar svara på, seier Jonas Gahr Støre (Ap).
I kveld svarer statsministeren på fleire spørsmål knytt til Kjerkol-saka.
Han seier at han har sett likskapane mellom masteroppgåva hennar og andre tekstar, men understrekar igjen at det er opptil Nord Universitet å vurdera saka.
Men kan du leva med ei usikkerheit om Kjerkol om denne prosessen tek tid?
– Den må ta tida den skal ta. Dette har me rettstryggleik å gjera, seier han og understrekar at Kjerkol har rett på at saka vert behandla likt for ho som for andre studentar.
– Borch tok avgjerda sjølv
Laurdag avslørte VG at delar av masteroppgåva til Kjerkol er identiske med ei tidlegare publisert masteroppgåve.
Sidan då har NRK og andre medium funne fleire likskapar mellom oppgåva hennar og andre tekstar.
Då Sandra Borch (Sp) trekte seg etter avsløringar om plagiat i masteroppgåva, uttalte Støre at feilen hennar var uforeinleg med å vera minister.
Men når det gjeld helseminister Ingvild Kjerkol (Ap), har Støre ved fleire høve sagt at han har tillit til ho som statsråd.
På spørsmål om kvifor ikkje Borch fekk den same behandlinga av plagiatsaka hennar, svarer Støre at det var Borch som trekte seg.
– Borch trekte konklusjonen sjølv om at det som var kome fram ikkje gjorde det mogleg for å ho å halda fram som forskings- og høgare utdanningsminister.
Støre vil ikkje svare på kva som skjer viss det skulle visa at også Kjerkol har plagiert.
– Baserer på tillit
Sjølv har Kjerkol sagt enkelte delar av oppgåva liknar andre tekstar på grunn av same metodebruk.
Seinare la ho til at likskapane også kom som eit resultat av redigeringsfeil i oppgåva og mangelen på korrekt kjeldehenvising.
Støre seier praksisen i dag ikkje er å tekstanalysera master- eller doktorgradane til statsrådane deira. Det vart heller ikkje gjort når professor Oddmund Hoel (Sp) tok over ministerposten for Borch.
– Det kan godt henda at SMK må begynna å tekstanalysera alle publikasjonar, men me er ikkje der nå. Eg trur at det er riktig at me baserer det på tillit, seier Støre.
– Mest smertelege
Avgangen til Borch gjer at det så langt er seks statsrådar som har måtta forlata posten sin.
Støre understrekar at tre av dei måtte gå av for forhold frå før dei vart statsråd.
– Det er noko av det mest smertelege ein må gjera som statsminister. Å be ein kollega som du veit jobbar hardt gå av, fortel han.
– Folk spør om dei som sit på toppen av samfunnet ikkje får konsekvensar om dei gjer feil. Eg vil visa at me har ein ansvarskultur, dei får konsekvensar.