Ein god miljøprofil blir heilt avgjerande for kva byar som får pengar til sine vegpakkar.
– Staten er veldig oppteken av at byane innfører verkemiddel eller gjer grep for å prøve å dempe veksten i biltrafikken, seier strategisjefen i Statens vegvesen, Kjetil Strand.
Dermed vil ein bypakke som berre inneheld bygging av vegar ha små sjansar til å oppnå pengane frå staten.
– Då må det inn ei stor satsing på både kollektivtrafikk, sykkeltrafikk og gonge, seier Strand.
Knallhard konkurranse
Regjeringa vil sette av 26 milliardar kroner til bypakkar i landet. Dermed er det ein knallhard konkurranse mellom byane.
Strand reknar med at i pakken på 26 milliardar kroner er det alt teke med pengar som skal gå til gong- og sykkelvegar.
Tre byar i fylket
Tre kommunar jobbar med bypakkar i Møre og Romsdal. Ålesund, Molde og Kristiansund er i full gang med eit program for utbetring av vegar, kollektivtrafikk, og gang og sykkelvegar.
– Reint formelt har vel Molde kome lengst med bypakken sin i fylket i og med at dei for andre gong har fatta bystyrevedtak, slik at dei har eit formelt grunnlag for ein bompengesøknad.
- Les også: Vedtok bomring i Molde
- Les også: Bytunnel må komme før Møreaksen
Ålesund har og jobba med bypakken lenge.
– Dei blir litt forsinka gjennom at vi framleis held på med ei konseptvalutgreiing, seier Strand.
– Betyr det at Kristiansund har den lengste vegen å gå per i dag?
– Det er kanskje minst modent i Kristiansund, slik at det er ei utfordring for Kristiansund å tenke prioritering og få sett i gang planlegging, seier Strand.