Sigrid si andre plate «How To Let Go» kom ut for ei veke sidan.
NRK sin meldar trilla femmar, og responsen frå publikum har ikkje late vente på seg.
I kveld gjekk albumet inn på 2.-plass på den britiske topp 100-lista, melder BBC.
Med den listeplasseringa i Storbritannia tangerer Sigrid, A-ha. Tre av A-ha sine album gjekk til andreplass i perioden 1985–1988.
Sjå dokumentaren om A-ha i NRK TV.
– Heilt rått!!! Er nokre gledestårer ute og går no, haha. Eg er så utruleg stolt og takknemleg, skriv Sigrid i ein SMS til NRK.
Begeistringa delar ho også med følgjarane sine på Twitter:
Her heime toppar albumet VG-lista.
I 2019 nådde Sigrid sitt fyrste album, «Sucker Punch», fjerdeplass på den britiske platelista.
Sunnmøringen er for tida på turne. Denne helga spelar ho i Leeds og Kingston i England.
Gler seg til i sommar
Etter fleire år med internasjonal suksess har Sigrid ein fullbooka sommar framfor seg. Det blir konsertar i Canada, ti av dei største byane i USA og i Europa.
Men heimepublikumet får også sin bit. Etter planen skal Sigrid halde sju konsertar i Noreg i sommar.
Oslo, Kristiansand, Tønsberg, Molde, Bodø, Trondheim og Tromsø står på programmet.
Solbakk Raabe gler seg til å få spele plata som så mange høyrer på no.
«Tusen, tusen takk til alle som lytta på plata. Vi sees snart på festivala i sommer!!!» skriv ho til NRK.
