Då Sebastian Foss Solevåg (29) frå Ålesund sikra Noregs første VM-gull i slalåm på 24 år i vinter var han så glad at han gret.
Først no har gullguten fått tid til å feire gullet. Det skjedde i helga med ein real gutetur på Sunnmøre saman med lagkompisar og støtteapparat. Og forma er inne. Det fekk han vist då han tok med gjengen på 10 timars topptur i bratte sunnmørsalpar.
– Sebastian jogga opp og cruisa ned, seier ein imponert Lasse Kjus. Han kom til feiringa i eige småfly.
Og Sebastian er også overraska over Kjus på randoneetur.
– Lasse overraska positivt. Lett gaselle, vil eg seie, ler Solevåg.
Alpingutta dro på topptur i Trandalen på Sunnmøre.
Satsar mot OL
Det har ikkje vore strake vegen til gull for Sebastian Foss Solevåg. I mange sesongar var han kjent for å vere ustabil og han hadde mange utforkøyringar.
I januar tok han sin første verdscupsiger, så blei det VM-gull i lagkonkurransen i parallellstorslalåm. Og på VMs siste dag toppa Solevåg det heile med Noregs fyrste VM-gull i slalåm på 24 år.
No satsar han for fullt mot OL og slalåmcupen. Den står aller høgst.
– Slalåmcupen viser at ein er god gjennom heile sesongen. Ein er ein betre slalåmløpar når ein vinn cupen enn «berre» eit OL-gull. Men i år vil eg vinne begge deler, smiler Solevåg.
På golbana var det meistermøte mellom Karsten Gefle, Sebastian Foss Solevåg, Atle Lie McGrath, Lucas Braathen og Lasse Kjus.
Foto: Jan Erik Finsæther / Jan Erik FinsætherSein blomstring
Lasse Kjus tok sitt fyrste VM-gull som 22-åring. Solevåg derimot blei 29 år før han fekk stå på toppen av pallen i eit VM. Han tenker at alder ikkje har noko betydning og han har tenkt å halde på i mange år til.
– Det er betre å blomstre enn å aldri blomstre. Motivasjonen er der og eg held på så lenge eg kan, seier Solevåg. Draumen er at Narvik skal få arrangere VM i 2027. Då vil han avslutte karrieren der.
Kjus trur heller ikkje alder vil vere noko hinder for Solevåg framover.
– Det største problemet med alpint er å overleve alle skadane, seier Kjus.
Sebastian vart ovveraska med gullkake i helga.
Foto: Tore Ellingseter / NRKTilbake frå skader
To som veit mykje om skader er Atle Lie McGrath og Lucas Braathen. Dei deltok ikkje i VM, men var ute med langtidsskadar.
McGrath har hatt sine første dagar på ski og er så å seie friskmeldt.
– Eg skal aldri meir sjå på ein dag på ski som dårleg meir. Det er mykje verre å sitje heime og ikkje få halde på med det ein vil, seier McGrath
For Lucas Braathen ser det også lyst ut og målet er å vere med på felles skitreningar frå august.
Tips frå gamle ørn
Helga med golf, ribbåt, ski og bading i fjorden motiverer landslagskompisane. Måndag startar hardkøyret med oppkøyring til OL-sesongen.
Og Kjus har villig delt av sine erfaringar.
– Eg har fått nokre småtips frå han gamle ørna, så vi er klar for gull neste år, seier Solevåg.
