Etter planen startar bygginga av ei laksesperre i elva om kort tid, og den skal hindre laksen å gå opp og gyte. Ein gong var Driva Noregs fjerde største lakseelv. Men gyrosmitte har øydelagt mykje.
For første gang
Prosjektet er det første og største av sitt slag i landet, og kjem til å ta nærare 10-15 år å gjennomføre, fortel seniorrådgivar Trond Haukebø ved Fylkesmannens miljøvernavdeling.
– Dette er ei stor sak. Eg kjenner ikkje til at det er gjort nok liknande internasjonalt heller, så det er i verdsklasse det vi no gjer, seier han.
Ei laksesperre 24 kilometer opp i vassdraget skal hindre laksen å gå vidare til gyteplassane. Etter 5-7 år, vil all laksesmolt vere borte og resten av elva blir rotenonbehandla.
Redd for turistnæringa
Men skeptikarane meiner det er bortkasta pengar. Dei fryktar at heile turistnæringa i Sunndal blir øydelagt for tiår framover, sier Halvard Hagen i Driva elveeigarlag.
– I store, kompliserte vassdrag som Driva, er erfaringane heller dårleg. Dette her vil jo ta kanskje 15 til 20 år. Det vil bli heilt dødt i den perioden, og om du då eventuelt har greidd å kvitte deg med gyroen, skal dette byggast opp på kunstig vis, basert på genbanken.
– Utfallet av operasjonen er høgst usikkert, meiner Halvard Hagen i Driva elveeigarlag.