Dei aller eldste hugsar reiarlaget Møre Fylke. Seinare vart dette gjort om til Møre og Romsdal Fylkesbåtar. Også etter at ferjeselskapa i Møre og Romsdal og Sogn og Fjordane slo seg saman i Fjord1-konsernet, har det vore ein sterk administrasjon i Molde.
I dag kan det heile vere over. Styret i Fjord1 behandlar eit forslag om at heile administrasjonen skal leggjast til Florø i Sogn og Fjordane.
– Folk er urolege. Dette har vore ein smertefull prosess, spesielt for dei tilsette i Molde, seier tillitsvald i fagorganisasjonen Negotia, Hilde Vilnes, til NRK.
– Svært spent
Det arbeider 32 tilsette ved Fjord1-kontoret i Molde. No følgjer dei spent med på kva som skjer på styremøtet.
– Vi er veldig spente på kva utfall saka får i dag, seier ho, og legg til at vedtaket får spesielt store følgjer for dei tilsette i Molde.
- Les også:
– Blei kasta på oss
Hilde Vilnes seier at dei tilsette visste at det var ein effektiviseringsprosess på gang i Fjord1. Men ifølgje henne var det ikkje kjent at kontora skulle lokaliserast på same stad. Dette fekk dei tilsette først vite om 11. mars, seier ho.
– Prosessen blei brått kasta på oss. Vi klarte mellombels å stoppe prosessen, fordi dei tillitsvalde ikkje var tekne med i prosessen. Dermed blei saka utsett til i dag, fortel Vilnes.
- Les også:
– Avgjerd på feil grunnlag
I Noreg er det hard konkurranse om ferjedrifta. Frå eit system som i hovudsak har vore basert på tildeling av konsesjonar på rutestrekningar, er systemet i dag i stor grad basert på anbodskonkurransar. I takt med denne utviklinga, og beinharde budsjettmessige prioriteringar i offentlege samferdslebudsjett, har Fjord1-økonomien blitt strammare.
– Styret er i ferd med å ta vedtak på feil grunnlag. Alle tilsette har vore uroa for framtida til Fjord1. Alle, både i Molde og i Florø, har vore opptekne av å snu den negative trenden i reiarlaget. Men reiarlaget misser mykje verdfull kompetanse om alt skal samlokaliserast i Florø, seier Vilnes.
– Uroa for framtida
Vilnes trur ikkje det kjem til å vere vanskeleg for dei tilsette i administrasjonen i Molde å finne anna arbeid. Ho er mest uroa over framtida til Fjord1.
– Det er kompetent arbeidskraft som jobbar på Fjord1-kontoret. Folk her finn seg heilt sikkert anna arbeid. Men eg er uroa over framtida til reiarlaget om dei legg ned kontoret her i Molde. Vi brenn for dette selskapet, seier ho.
– Molde er ein by med rike ferjetradisjonar?
– Ja, Møre og Romsdal er jo det største ferjefylket i landet. Vi har lange tradisjonar. Ferjeselskapa har eksistert i veldig mange år. Å legge ned kontoret i Molde er å fjerne ein grunnstein, seier tillitsvald Hilde Vilnes.