Neste år skal 18.000 flyktningar busettast i norske kommunar. No jobbar nettstaden finn.no og Røde Kors med å gjere det enklare for kommunane å finne ut kva bustader som er tilgjengelege for flyktningar.
– Ein del av dei som leiger ut bustader har fått spørsmål om dei ynskjer å leige ut til flyktningar. Responsen er veldig god blant dei vi har snakka med, seier administrerande direktør, Sondre Gravir i finn.no.
Tidstjuv
Nettstaden utviklar ei løysing der alle bustadane som er tilgjengelege for flyktningar vert samla på ein plass. I tillegg skal leigetakarane få betre informasjon om kva det inneber å leige ut bustaden til flyktningar. Tenesta har fått namnet Hjarterom.
– Den største tidstjuven er at flyktningkonsulentane rundt om i kommunane må bruke tida på å følge med på kva bustader som er til leige og kontakte kvar einskilt utleigar. Vi vil forenkle prosessen slik at både flyktningkonsulenten og flyktningane sjølve ser kva bustader som er tilgjengelege, seier Gravir.
LES OGSÅ:
Viktig med tryggleik
Asbjørn Olsen frå Ålesund er ein av dei som har bustadannonse på nettstaden og som har fått spørsmål om han vil leige ut til flyktningar eller ikkje.
– Dette kan vere ein grei måte å gjere det på. Folk kan jo svare ja eller nei som dei vil, seier Olsen. Sjølv ser han ikkje noko problem med å leige ut leilegheita si til flyktningar, men han vil vurdere dei på same måte som norske.
– For ein utleigar er det viktigaste at du får leigeinntekter, at bustaden ikkje vert forringa og at folka som bur der ikkje lagar bråk, seier Olsen. For han er det ei tryggleik dersom det er kommunen som står som leigetakar.
Vanskeleg for kommunane
Helge Eide, direktør for interessepolitikk i KS, seier at alle slike tiltak som for å finne bustader til flyktningar er kommunane glade for.
– Dei største utfordringane for kommunane er å finne eigna bustader. Det å auke tilgangen til bustader er eit viktig bidrag for å kunne seie ja til å busette fleire flyktningar, seier Eide.
Han trur at nordmenn synest at det er viktig å hjelpe til i denne situasjonen.
Bra at fleire bidreg
Tidlegare i haust lanserte stiftelsen bidra.no ei nettside for å kartlegge kven som vil opne heimen sin for flyktningar. Styreleiar Jan Olav Ryfetten synest satsinga til finn.no og Røde Kors er bra.
– Jo fleire som sett fokus på flyktningssituasjonen, dess betre er det, seier Ryfetten. Så langt har 2200 nordmenn gitt tilbakemelding til stiftelsen om at dei har ledig husvære.