Ny Molde-tur for Chick Corea

Pianolegenda Chick Corea kjem nok ein gong til Molde. Han har gjesta jazzbyen fleire gongar før.

Chick Corea

Chick Corea kjem på nytt Molde-besøk.

Foto: Langmyren, Kjell / SCANPIX

Under jazzfestivalen i 2000 hadde Corea det som blei kalla for ein mirakelkonsert. Denne gjentok han i ein ny versjon hausten fem år seinare, då saman med Trondheim Jazzorkester, som han har arbeidd mykje saman med.

Chick Corea feirar 75 på Moldejazz

I 2007 måtte det ekstrakonsert til då Chick Corea og vibrafonisten Gary Burton deltok på Moldejazz, og to utselde Bjørnsonhus tok imot musikarane med stor glede.

Markedssjef Hans Olav Solli

Festivalsjef Hans-Olav Solli er glad for at Chick Corea kjem til Moldejazz neste år.

Foto: Gunnar Sandvik/NRK

Tysdag 19. juli er han igjen på plass i Bjørnsonhuset i forbindelse med ein kort Europaturné for å markere at pianisten fyller 75 år i 2016. Konserten er ein av berre fem konsertar som Corea gjer med bandet sitt i Europa denne sommaren.

Andre artistar han har hatt eit nært samarbeid med er Stan Getz, Herbie Hancock og Miles Davis. Sistnemnde blir hylla i prosjektet «Homage to Heroes» på Bjørnsonhuset 19. juli.

Festivalsjef Hans-Olav Solli fortel at Moldejazz er glad og æra over å vere blant dei få utvalde, og ser det som eit uttrykk for Coreas spesielle forhold til ein festival han har gjesta ein rekke gonger.

– Spesielt under sitt vekelange opphald i 2000 knytte Corea sterke band både til byen Molde, festivalen og det norske jazzmiljøet, skriv Solli i ei pressemelding.

Litt om programmet

Lars Vaular 2015

Lars Vaular skal ha klubbkonsert i Teatret Vårt.

Foto: Mattis Folkestad / NRK P3

Frå før er det klart at Ola Kvernberg frå Fræna skal vere artist in residence under Molde Internasjonale Jazzfestival, som blir arrangert i veke 29 som vanleg.

Jaga Jazzist skal avslutte festivalen, medan Solveig Slettahjell og Knut Reiersrud skal ha konsert i Molde Domkyrkje, og Lars Vaular skal ha klubbkonsert i Teatret Vårt.