Er du ein av dei som har planlagt noregsferie i sommar, har du garantert vore innom tanken om å køyre Trollstigen. Her kan ein snirkle seg i sikksakk frå havnivå og opp i over 1000 meters høgde, og satse på at bremsene held når du skal ned igjen.
Frå og med i ettermiddag kan tanken om eit besøk bli ein realitet. Etter å ha vore vinterstengd, blei brøytemannskapa endeleg ferdige. Først i køen sto eit fransk reisefølgje.
– Vi høyrde frå eit anna fransk par at vegen skulle opne i dag, så vi berre reiste opp, seier Lucie Voisinne.
Saman med kompisen Ewen Lecomte har ho reist Europa rundt i ein varebil i fem månader, og er overbegeistra over naturen i Noreg.
– Noreg er fantastisk. Av alle landa vi har besøkt i Europa, er dette landet med flest fossar og fjellandskap, seier dei to.
Uvanleg sein opning
Allereie frå midten av mai brukar tusenvisa av turistar frå inn- og utland å legge inn Trollstigen på GPS-en. Men store snømengder, snøskred og steinskred har skapt store utfordringar for opninga av Trollstigen i år. I mai blei det rapport om snøskred som hadde øydelagt både vegen og eit kafebygg. Midt i oppryddinga gjekk eit stort steinskred.
Først i dag var alt klart.
– Dette må vere rekord, eg har aldri sett det slik dei åra eg har vore her, seier Roar Vikhagen, som er byggleiar i Fylkesveg.
Han seier det har vore mange som har vore oppom og banka på bommen dei siste vekene.
Mange med ski i bilen
Det var ei lang, lang rekke av motorsyklar og bubilturistar som sto venta på å trø på gassen då bommen opna i ettermiddag. Blant dei var også fleire lokale skikøyrarar. Det er gjerne konkurranse om å vere først opp på fjelltoppane i området.
Først når vegen opnar er det råd å kome seg dit.
– Eg reknar med at mange har ski i bilen i dag, seier Vikhagen.
Vegsambandet Trollstigen er snart 100 år gamalt og er del av 18 unike vegstrekningar i Noreg, dei Nasjonale Turistvegane.