Dei siste dagane er Johnny Depp ein av dei mest omtalte personane i verda.
Rettssaka mellom filmstjerna og ekskona, Amber Heard, blei avgjort onsdag.
Hemmeleg gjest
24. juni skal han spele saman med Jeff Beck på Sentrum Scene i Oslo.
Dagen etter går turnéen vidare. Då går Depp og Beck på scena i Kristiansund.
– Det er stadfesta. Depp kjem til Kristiansund, seier ein svært entusiastisk leiar i Tahitifestivalen, Thomas Ingebrigtsen Lem, til NRK.
Det har lenge vore klart at Jeff Beck skulle ha med ein hemmeleg gjest på turné.
Denne helga dukka Depp opp som gjestegitarist då Beck spelte konsert i Sheffield.
Sidan har snakket gått i nordmørsbyen, og no er det altså bekrefta at Depp kjem til Kristiansund.
Det var VG som fyrst omtala at Depp skulle til Noreg.
– OJ!
Tahitifestivalen i Kristiansund opplyser at billettsalet til no har gått greitt, men i løpet av ein time etter at det blei kjent at Depp kjem til festivalen, var 2000 nye billettar borte.
– Det er litt rart. Vi har ein av verdas beste gitaristar på festivalprogrammet, men så må det ein gjestegitarist til, ein skodespelar, for at folk kjem springande, seier festivalsjef Thomas Ingebrigtsen Lem.
Han seier at dei fekk endeleg stadfesta torsdag ettermiddag at Depp kjem til nordmørsbyen.
– Då tenkte eg: OJ! Men det skal gå bra. Vi har erfaring med å ha svære artistar her, så det skal gå greitt både med tanke på sikkerheita til publikum og artistane.
Kristiansund og Oslo er dei einaste norske stoppa på Jeff Beck sin sommarturné. Den verdskjende gitaristen har vore aktiv sidan 1960-talet.
OPPDATERING: Konsertane i både Oslo og Kristiansund er no utselde.
Må betale erstatning
Depp saksøkte Heard for tre ulike utsegn i ein kronikk i Washington Post. Der refererte ho til seg sjølv som «ein offentleg figur som har opplevd vald i nær relasjon».
Depp fekk medhald på alle punkt.
Rettssaka mellom det tidlegare ekteparet har fått stor merksemd.
Heard er dømd for ærekrenking. Ho må betale 10 millionar dollar i erstatning og 5 millionar i oppreisning til Depp. Depp kravde opphavleg 50 millionar dollar.
Etter at dommen var lest opp fastslo dommaren at den siste summen har et tak på 350.000 dollar.
Depp får dermed 10,35 millionar dollar, tilsvarande nesten 100 millionar kroner.