Politiet i distrikta skal patruljere på internett

I Ulstein kommune på Sunnmøre er det nyleg tilsett ein etterforskar på digitalt politiarbeid.

Etter to ferske saker der ungdomar og sosiale media er fellesnemnarar, er behovet stort for dette, meiner lensmann Hans-Eirik Pettersen.

– Politiet og andre aktørar har eit betydeleg forbetringspotensial på dette feltet. Spesielt når det handlar om å førebygge kriminalitet.

– Vi føler veldig sterkt at utviklinga går frå oss. Vi er på etterskot, og det er ein vond følelse. Vi må komme i forkjøpet, slik at vi kan stanse ei negativ utvikling, seier Pettersen.

Problemstillinga er ikkje ny. Hans Marius Tessem peika på tematikken i ei ytring i august. Der hevdar han at digital trakassering, utpressing og hevnporno aukar i omfang, og at politiet manglar både evne og vilje til å stanse problemet.

– Lukkar seg meir inne

– Vi ser ein tendens til at ungdom no lukkar seg meir inne i private grupper. Tidlegare var nettbruken prega av opne samfunn der all informasjonen var tilgjengeleg, forklarer Bea Rye.

• LES OGSÅ: Politiutdannelsen må reformeres

Rye er nyleg tilsett som digital etterforskar, og vedgår at det krevst meir og meir for å ha oversikt på nettet. Det er ei utfordring for politiet.

– Hendingar blir filma, lagt ut og spreidd på nettet. Ofte får folk vite mykje om ei hending før politiet i det heile tatt veit at det har skjedd noko.

Patruljering på nettet

– Vi kan ikkje lenger berre ha patrulje i den analoge verda. Vi må også patruljere internett og den digitale arenaen, seier Øyvind Buraas i Politidirektoratet.

Derfor blir det oppretta stillingar til etterforskarar som jobbar spesifikt med digitalt politiarbeid.

Etter kvart vil det også bli fleire tilsette som jobbar med førebygging av kriminalitet på internett.

Kripos har det allereie, men i løpet av 2018 blir det også prøvd ut i fleire politidistrikt rundt om i landet.

Styrka førebygging

Politidirektoratet har dei siste åra fått tydelege, politiske signal på at det førebyggande arbeidet skal bli prioritert.

– Førebygging skal vere ein primærstrategi. Ikkje berre mot barn og unge, men på alle område av politiarbeidet, seier Buraas

Eit av hovudmåla i 2018 er å styrke førbygginga av kriminalitet, ifølge tildelingsbrevet frå Justis- og beredskapsdepartementet.

Ifølge Buraas blir det brukt meir ressursar på det, og han seier det er ein heilt annan plan for det førebyggande arbeidet, enn det var for fire-fem år sidan.