Her er alle 17-åringar sikra sommarjobb

Den unge jenta har berre gått fyrste året på vidaregåande, men er allereie aktiv i arbeidslivet. På omsorgsbustaden i Surnadal lagar Holte mat, vaskar, handlar og hjelp til med andre kvardagslege ting for brukarane.

– Eg trivast veldig godt her og det er ei god erfaring og ta med seg vidare, seier ho. I dag er Kristine ute i hagen saman med dei eldre på bustaden.

Vinn-vinn situasjon

I 10 år har Surnadal kommune hatt prosjektet "Sommarjobb for ungdom". I år har alle som er fødd i 1999 og som har søkt , fått tildelt ei veke sommarjobb i kommunen.

– Dette er ein vinn-vinn situasjon. Ungdommane er ein stor arbeidsressurs for oss i tillegg til at dei får jobberfaring og ein god start på arbeidslivet, seier rådmann i Surnadal, Knut Haugen.

I år har 60 av 100 ungdom søkt og fått jobb. Syttenåringane får betalt arbeid, men fungerer som ein ekstraressurs i tillegg til andre som har sommarvikariat.

Gjer kommunen dette for å få ungdom til å ville bli i Surnadal etter vidaregåande?

– Nei, men vi ynskjer å gje ungdommane ein forsmak av arbeidslivet og eit inntrykk av Surnadal som ein god stad å arbeide og bu i. Det er alltid positivt om ein kan rekruttere folk til å søke sommarjobb eller fast jobb i kommunen seinare i livet, seier rådmannen.

Mange jobbmoglegheiter

Jobben på omsorgsbustaden er Kristine Holte sin fyrste jobb innanfor helsesektoren.

Er det å få jobb med på å knytte ungdom til kommunen?

– Ja det kan det gjere. Det er veldig mange ulike jobbar ein kan velje mellom i kommunen, så ein har gode moglegheiter til å lære nye ting innanfor kommunens ansvarsområde, seier Holte.

Kommunen betaler løna og ungdommane kan velje mellom mange ulike jobbar innan barnehage, vedlikehald, omsorg eller fotballskulen Surnadal IL, blant anna.