Nyleg sto John Jeanette Solstad Remø fram i vekebladet Hjemmet der han fortalde korleis det har vore å leve eit langt liv som transvestitt.
– Eg har fått berre positive tilbakemeldingar, seier 66-åringen til NRK Møre og Romsdal.
Les også:
Gøymde kvinnekleda i safen
I reportasjen kom det mellom anna fram at han allereie som liten gut merka at han likte aller best å ha på seg kvinnekle. Men det blei ikkje godt motteke. For å bevise for seg sjølv at han var mann, begynte han på sjøkrigsskulen i Bergen, og blei seinare ubåtkaptein.
– Det var tøffe tider, vi patruljerte langs norskekysten og i Barentshavet med full krigslast. Og Jeanette var med meg hele tiden. Klærne hadde jeg i safen om bord i ubåten, fortel pensjonisten.
Tatt på fersken
I vekebladet kjem det fram at John som femtenåring blei tatt på fersken i dameklede i Ulsteinvik. Då blei freistinga for stor, og kleda til mora uimotståelege. Ute i gatene møtte tenåringen ein gutegjeng, og blei oppdaga.
- No kom alle til å få vite det! Eg ville berre dø. Men eg ville jo ikkje det heller. Eg bestemte meg iallefall for å prøve litt til, og tenkte at eg måtte vere tøff i trynet og ta tyren ved horna, seier Solstad Remø.
Og femtenåringen klarte faktisk å snakke det vekk.
Kjenner på gamal skam
John Jeanette Solstad Remø bur i dag i Oslo, etter å ha flytta frå heimbygda som ung mann. I hovudstaden går ho stort sett i kvinneklede, men har førebels ikkje gjort det i Ulsteinvik. Ho seier ho ikkje er heime så ofte lenger, og at det ikkje har passa slik, men vedgår at ho også kvier seg.
– Eg kjenner på gamal skamkjensle og litt angst. Eg er rimeleg sikker på at ulsteinvikingane vil takle det bra, seier 66-åringen, som i dag er pensjonist.
Far og farfar for tre
John Jeanette Solstad Remø har alltid kjent seg som kvinne i ein mannskropp. Men først i 2010 sto 66-åringen offentleg fram som transperson. I mellomtida hadde Solstad Remø gifta og skilt seg, og funne kjærleiken med ei ny kvinne. Han er i dag far og farfar og har det godt.
– Det er befriande godt å kunne vere fullt og heilt menneske, seier Solstad Remø til Hjemmet.
Les også: