Over hundre personar møtte opp for å protestere mott kutta i hjarterehabiliteringa ved sjukehuset i Ålesund. Dei frammøtte deltok i ei utandørs treningsøkt for hjartepasientar.
Helse Møre og Romsdal skal spare tilsvarande 130 stillingar for å kome i økonomisk balanse og eit av tilboda som er foreslått endra er rehabiliteringa av hjartesjuke. Det har sett sinna i kok hos både politikarar, tilsette og pasientar.
Per Aase har hatt sju hjarteinfarkt og for han betyr tilbodet på hjarterehabiliteringa alt.
– Visst rehabiliteringa blir kutta, så går det ut over alle oss hjartepasientane.
Vil ha hjartesenter
Lege Egil Romslo Schistad og dei andre aksjonistane meiner at kutt i tilbodet er heilt feil veg å gå. Dei vil i staden bygge opp eit hjartesenter ved sjukehuset i Ålesund.
– Eg får inn pasientar der hjartet skrik etter hjelp og må reddast raskt. Eg gir medisinar, men inni meg veit eg at dei burde hatt eit betre tilbod, seier Schistad.
I dag blir alvorleg sjuke pasientar som treng utblokking av tronge eller tette årer (PCI), sendt til St. Olavs hospital i Trondheim. Før dei blir sendt dit får dei ein medisin som skal løyse opp blodpropp.
Det er nær 700 som får hjarteinfarkt kvart år i Møre og Romsdal. Schistad meiner reiseavstandane i luftambulanse gjer at pasientane burde hatt tilbodet nærare, sidan tida for å få behandling er avgjerande. Torsdag skal også bystyret i Ålesund skal behandle saka. Ordførar Eva Vinje Aurdal (Ap) vil ha ny utgreiing av eit PCI-senter ved Ålesund sjukehus.
For få pasientar
PCI er den mest brukte behandlinga for å opne tette kransarteriar, men det blir berre utført ved få sjukehus i landet. I Nord-Noreg var det ein årelang strid for å få tilbodet også ved sjukehuset i Bodø. Fagfolk i Tromsø meinte at eit slikt tilbod ville svekke fagmiljøet, men no er senteret i Bodø under oppbygging.
Det har vore fleire utgreiingar om eit PCI-tilbod i Ålesund og konklusjonen er at pasientgrunnlaget er for lite og at ein bør samle seg om eit solid tilbod i Trondheim.
Rune Wiseth er sjef ved klinikk for hjartemedisin ved St. Olavs hospital og leiar i fagrådet for hjartemedisin i Helse Midt Noreg. Han seier at eit samla fagmiljø er samde om at eit hjartesenter i Ålesund ikkje er vegen å gå.
– Det er utarbeidd eit velfungerande system for dei akutte hjarteinfarkta i Møre og Romsdal, der ein brukar det vi kallar «plumbomedisin», seier Wiseth. Ifylgje han er resulta etter behandling like god for hjartepasientar i Møre og Romsdal, som i Sør-Trøndelag.
Lokalsjukehusa skal gi diagnose
Hjartespesialistane i Helse Midt-Noreg er samla i dag for å diskutere korleis diagnostiseringa av hjartesjuke kan bli betre. Wiseth trur at ved å ta i bruk utstyr som lokalsjukehusa allereie har i dag, treng færre pasientar å bli sendt med fly til Trondheim.
– Tida med å bygge hjartesenter er forbi. Talet på hjarteinfarkt går ned, så det er ikkje tidsaktuelt å vurdere PCI i Ålesund no, seier Wiseth. Styret i Helse Møre og Romsdal har tatt satsing på PCI ut frå langtidsbudsjettet.
Bør få beste behandling
I Ålesund er ikkje aksjonistane samde. Lege Egil Romslo Schistad meiner utgreiingane ikkje er gode nok og at argumentet om for lite pasientar ikkje held mål. Han viser til sjukehuset i Arendal, som vart kåra til beste hjartesenteret i landet, med rundt 700 infarkt i året, det same som i Møre og Romsdal.
– Det er ikkje debatten som er utdatert, men vår hjartebehandling er det. Framtida er små og likevel gode PCI-senter, nærare folk, seier Schistad.