Gjennom heile helga har regnet hølja ned og bevegelsane i fjellet har auka. Søndag kveld såg ein teikna til at det skulle roe seg. I dag justerte NVE ned farenivået i den rasutsette delen av fjellpartiet Mannen og dei evakuerte fekk flytte heim.
LES OGSÅ:
– Travelt å leve slik
På garden til Gunn Valstad Sogge rår det reine idyllen i solskinet.
– Vi er letta over å kome tilbake til garden i dag, men vi reknar med at vi må evakuere igjen når veret endrar seg, seier Sogge.
Ho håper at fjellpartiet skal rase, slik at den usikre tilværet kan ta slutt.
– Vi håper fjellet kjem, så vi kan bli ferdige med dette. I lengda er det travelt å leve slik. Det er ein stressituasjon for alle, seier Gunn Valstad Sogge.
Vil ikkje flytte
Ho har budd på garden i snart 30 år og familien har lagt ned mykje arbeid her. Tanken på å flytte frå garden, har streifa dei.
– Vi har byrja å tenke på at vi kanskje må flytte ein gong, men det er ikkje det vi ynskjer. Vi har omtrent bygt opp garden frå grunnen, seier Sogge.
Dei har ca 400 sauer på garden. På andre sida av vegen har sauene beredskapsfjøs og fredag brukte familien heile kvelden for å få sauene i tryggleik.
– Vi er vant til steinsprang og ras, men dette er eit stress i kvardagen, seier Sogge.
Faren er mindre
Slik sjefgeolog Lars Harald Blikra ser det er det ikkje fare for at farenivået blir oppjustert med det første.
– Det er ikkje akutt fare for at det skulle skje noko no. Bevegelsane går ned og det er ingen teikn på at det skal auke før vi før ny påverknad frå nedbør, seier sjefgeolog Lars Harald Blikra.