– Folk tek for lett på køyring i rus

– Det kunne ha gått mykje verre enn det gjorde. Eg er veldig glad for at eg kan sitje her og vere klar i hovudet, seier Jan Ove Selnes frå Averøy i Møre og Romsdal.

Lågmælt og alvorsprega fortel han om korleis livet vart snudd på hovudet på grunn av ei dårleg avgjersle.

– Planen min for våren var å jobbe, tene pengar og bli meir sjølvstendig. Men slik gjekk det ikkje.

Skulle heim frå fest

I februar syntest han ikkje fyllekøyring var så ille. For etter ein fest natt til 1. februar sette 21-åringen seg bak rattet. Han kom seg berre nokre hundre meter frå heimen ved Bådalen i Averøy.

– Eg hadde køyrt i fylla ein gong tidlegare, men eg lærte tydelegvis ikkje av det. Det måtte gå gale først, seier han.

• Les også: 20-åring kritisk skadd etter utforkøyring

Jan Ove hadde omfattande skadar etter krasjet. Legane måtte gi 22 liter blod for å berge livet hans. Eit liv han sjølv hadde sett på spel.

Døden nær

Høg fart og promille gjorde at 21-åringen krasja i autovernet og vart kasta ut av bilen. I over fire timar låg han bevisstlaus før han vart funnen. Frå ambulansen kom til han vart frakta over ambulansehelikopteret var han døden nær fleire gonger.

– Berre i ambulansen heldt dei på miste meg to-tre gonger. Det var lite håp, men eg klarte meg, fortel han forsiktig.

Dei indre skadane var så store at luftambulansen måtte mellomlande i Kristiansund for å kunne fylle på med blod. Det første døgnet måtte han ha blodoverføring seks gonger.

– Dei pumpa i meg totalt 22 liter blod. Det er mykje, fortel han.

Sidan vart han lagt i kunstig koma i ni dagar.

– Eg var sliten og påverka av medisinar då eg vakna, men eg hadde likevel ei kjensle av kva som hadde skjedd. Det var spesielt å føle på.

Vil endre haldningar

Jan Ove skildrar livet etter ulukka som "veldig trist og veldig hardt". Forutan fleire månader i rullestol, slit han med sterke nervesmerter. Derfor vil han ikkje at andre skal måtte gå gjennom det same som han.

– Det er trist at promillekøyring skjer. Det har vore mykje av det her på Averøy. Eg håper at folk vil lære av andre og ikkje ta det så lettvint.

Seinast i sist veke small det igjen på heimstaden til 21-åringen. Også der mistenker politiet at den eine sjåføren var rusa. Jan Ove, som sjølv tok lett på fyllekøyring, trur mange tenker slik han gjorde natt til 1. februar.

– Her på Averøy vert ikkje folk overraska om ein køyrer i fylla. Politiet er langt unna, så det er lett å gjere det.

• Les også: Northug har forklart seg til politiet om bilulykken
• Les også: «Det er en trist sak, men …»

– Aldri meir

Jan Ove er framleis innlagt på sjukehus og helsa vert sakte, men sikkert betre. Planen er å kunne gå på krykker i slutten av mai for å så bli heilt frisk.

– Målet er å kunne utan gå hjelpemiddel og få arbeid som maskinførar igjen. Dei seier at eg kan klare det om eg har fullt fokus på trening og står på.

– Kjem du til å køyre med promille igjen?

– Aldri.

• Les også: Fem menn tatt for promillekøyring