- Fortent siger til Molde

- Det var dårleg fotball frå AaFK. MFK var til tider ein divisjon betre, seier Vidar Nakken.

Han står i oransje skjerf og drakt etter kampen, og seier han hadde ynskt seg større innsats frå heimelaget.

- Det var tannlaust i dag. Pasningane var dårlege, og det var fortent at MFK vann, seier han.

- Må legge oss flate

For det var bortelaget som var best i kampen om Møre og Romsdal. På to minutt i andre omgang skåra Mame Biram Diouf og Magne Hoseth, og dermed var kampen avgjort.

- Vi må berre legge oss flate og innrømme at vi møtte eit betre lag, og tapte fullt fortent, seier AaFK-trenar Kjetil Rekdal etter kampen.

Dermed er han heilt på line med dei som såg kampen frå tribuna.

• Les også: Molde best i Møre og Romsdal

- Det var fullt fortent. Utruleg deilig, seier Eli Anette Andreassen. Ho kjem frå Vestnes, men arbeider i Ålesund, og syns difor det var godt når bortelaget tok tre poeng. Saman med Ellen Marie Sætre var ho nøgd med kampen.

Tusen tilreisande frå Molde

- Det var mange sjansar også i fyrste omgang, men det er no kjekt når det er spennande også, seier Sætre.

Bortelaget fekk med seg om lag 1.000 supporterar til Ålesund laurdag, og mellom dei var to busslastar frå Åndalsnes.

- Eg var skuffa over AaFK i dag, seier Helge Gjerde. Utanfor Color Line Stadion står han med MFK-skjerf og andre støtteerklæringar til bortelaget, men likevel er det heimelaget han er skuffa over.

- Ingen som blør for drakta

- Sonen vår har spelt på begge laga, så då blir me skuffa når dei leverer slik. Det var heilt fortent at MFK tok alle poenga, seier Gjerde, som altså er far til Øyvind Gjerde som har spelt for både AaFK og MFK.

Supporterane på veg heim frå kamp var samde i at MFK var det beste laget, og at AaFK mangla den ekstra innsatsen som skal til for å vinne kampar.

Trykk på bildet til høgre for å sjå bilde frå då supporterane til dei to laga varma opp i Ålesund før kampen.

• Les også: Optimistar før lokalderby

- Det er ingen som blør for drakta. Det var ikkje nok innsats. Ein bør ta i i slike oppgjer, seier Asbjørn Ekornåsvåg, som var skuffa over det AaFK presterte.

- Men Molde var gode, vi skal ikkje ta frå dei det, seier han.