- Det blir 3-1, seier Mats Rovik. Saman med systera Tonje og faren Knut er han komen frå Gjøvik til Ålesund for å få med seg lokaloppgjeret mellom Aalesunds FK og Molde FK.
- Det blir grining dersom det ikkje blir siger i dag, skyt systera Tonje inn. Verken ho eller broren har nokon gong budd i Ålesund, men dei er begge medlemmar i supporterklubben Stormen.
- Blir ein jamn kamp
Sjå bilde frå oppladinga til kampen i bildegalleriet til høgre i artikkelen.
- Det har berre blitt sånn, fortel far Knut Rovik, som er fødd i Ålesund. Han fortel at dei hadde sesongkort fyrste sesongen AaFK spelte på Color Line Stadion, og at dei no tek turen så ofte som mogleg.
No reknar han, som borna, med at det blir ein heimesiger for AaFK.
Og dei er ikkje åleine om å tru det. Stormen har samla folk nok til å fylle to etasjar pluss eit uteområde på Metz ved Brosundet i Ålesund. Og supportersjefen Tom Walderhaug meiner det blir ein spanande kamp.
- Det blir ein jamn kamp, med mange duellar. Så det endar nok med 3-0 til AaFK, seier han med eit smil.
Han meiner det er viktig med laurdagskampane som samlar så mykje folk, og at stemninga kjem til å bli elektrisk på kampen når naboane gjestar stadion.
Overgangar viktig
I Kongens gate har gjestane rigga seg til. Med stort telt, livemusikk og om lag 500 personar skaper Molde-fansen god stemning før kampen.
Ved eit av borda sit Sindre Myklebostad frå Molde. Han bur i Oslo, og har reist til Ålesund berre for å få med seg kampen.
- Ein kan ikkje klage på denne stemninga, seier han.
- Det er jo cupfinalestemning her, håper berre den er like god etter kampen, ler han.
Han meiner overgangsspelet til Molde blir avgjerande i kampen, og at dei tre senegalesarane vil gjere det vanskeleg for heimelaget.
- Det blir nok ein jamn kamp, lik alle lokaloppgjer, men det blir heilt sikkert ikkje tap, trur han.
- MFK har betre lag
- Kjetil Rekdal sine genistrekar hjelp ikkje når MFK har eit betre lag, seier leiar i Tornekrattet, Eva Brit Mauseth.
Ho er også trygg på at bortelaget skal hente heim alle poenga frå Ålesund laurdag. Opp mot 1.000 gjestande publikummarar er komne for å hjelpe opp under prestasjonane til laget, og ho trur det vil føre fram.
- Vi vinn. Heilt sikkert, seier ho, og er trygg på at senegalesarane på laget vil gjere jobben.
Trur på god stemning
Og nettopp dei tre stjerneskota frå Senegal er det folk blant AaFK-fansen som er bekymra for.
- Dei må stoppast tidleg, og ikkje få rom, seier Bjørn Hellevik, som er på plass for å heie på heimelaget. Han håper på siger, og trur stemninga på tribuna blir god i laurdagskampen.
- Det er god stemning her hjå oss, men det er det oppe hjå MFK-fansen og. Så eg reknar med stort trykk på kampen, seier Hellevik.