Leviathan har vunne prisen for beste utanlandske film på Golden Globe og kan no vinne Oscar for beste utanlandske film i Hollywood 22. februar. Filmen handlar om ein mann sin kamp mot korrupt byråkrati og rettsvesen i ein landsby utanfor Murmansk.
(Artikkelen fortset under traileren)
– Jobbar for at filmen ikkje skal bli sett
Leviathan har fått svært gode omtalar i internasjonal presse og har blitt hylla av The Guardian, blant andre. Trass i at filmen blir lovprisa i utlandet så er ikkje Russiske myndigheiter begeistra for Leviathan.
Julie Wilhelmsen er seniorforskar ved Norsk utanrikspolitisk institutt (NUPI). Ho seier at myndigheitene aktivt jobbar mot filmen:
– Myndigheitene vil ikkje eksplisitt vere undertrykkande og forby, men dei finn heller andre skjulte måtar for å avgrense at filmen blir utbreidd.
«Anbefaler å ikkje vise Leviathan»
Russiske myndigheiter diskuterte i media å forby drama-filmen. Den 15. januar så blei filmen nominert til Oscar for beste utanlandsskrpåklege film.
Etter den prestisjetunge nominasjonen så seier myndigheitene at dei ikkje vil forby filmen, likevel.
Samtidig så skriv russiske medier at fleire kinoar har fått anbefalingar av myndigheitene om å ikkje vise filmen. Ein kinodirektør i Murmansk seier dette til den regionale avisa Zona Media:
«Det ser ut til at me må avstå frå å vise filmen, ingen vil ha problem med myndigheitene i regionen»
– Praksis frå Sovjet
Og når myndigheitene i Russland anbefaler kinoar å ikkje vise Leviathan, så er det meir enn ein vennleg oppmuntrande klapp på skuldra, fortel Russland-ansvarleg i Den Norske Helsingforskomite, Lene Wetteland:
– Anbefalingar veg veldig tungt. Dette er den same praksisen som ein hadde i Sovjet-unionen som var mykje basert på munnlege anbefalingar, fortel Wetteland.
Ho seier temaet for filmen er universelt, men at det er den realistiske skildringa av korrupsjon og mangelen på rettstryggleik som gjer at myndigheitene ikkje likar filmen.
Ny lov som kan sensurere
Det blir no jobba med å få gjennom ei lov i det russiske parlamentet Dumaen som vil forby filmar som myndigheitene meiner «er mot eit einskapleg Russland».
– Konsekvensane av denne lova som godt kan kome, er at ein vil forby filmar som viser noko anna det dei offisielle myndigheitene likar. Det betyr at Leviathan eksempelvis kan bli forboden, seier Wetteland i Helsingforskomiteen.