Til saman åtte personar kjem til å bli tiltalt i avlyttingskandalen i den tidlegare tabloidavisa News of the World, opplyser påtalemyndigheten i England og Wales, the Crown Prosecution Service.
Sju av desse er tidlegare tilsette i tabloidavisa News of the World. I tillegg blir Glen Mulcaire sikta, då han som privatdetektiv skal ha bistått avisa i avlyttinga.
I den foreløpige tiltalebeslutninga blir ei rekke kjendisar nemnt. Påtalemyndigheitene meiner at mellom anna Sven Göran «Svennis» Eriksson, Jude Law, Sienna Miller, Sadie Frost, Wayne Rooney, Angelina Jolie og Brad Pitt er blitt avlytta av tilsette i News of the World.
Avlytta sakna 13-åring
Mellom dei åtte som kjem til å bli tiltalt er Rebekah Brooks. Ho var redaktør i News of the World i 2002, året då journalistar i tabloidavisa skal ha avlytta telefonsvararen til 13-årige Milly Dowlers.
Då Milly Dowlers vart meldt sakna skal journalistar ha hacka seg inn på telefonsvararen hennar, avlytta desperate talemeldingar som kom inn, og sletta dei når innboksen var full. Slik skal dei ha gjeve falskt håp til familien om at Milly Dowler var i live.
Avsløringa av Dowler-saka var starten på slutten for News of the World. Det viste seg at avisa hadde avlytta ei rekke kjendisar, i tillegg til pårørande etter London-bombene i 2005.
Tette band til Cameron
Rupert Murdoch eigde taboidavisa News of the World, som vart lagt ned i juli i fjor. Murdoch har måtta betala dyrt for avsløringane, han har måtte stå skulerett for høyringar i det britiske parlamentet, samt gått glipp av eit oppkjøp av TV-giganten BskyB.
Les meir:
Saka er pinleg for Storbritannias statsminister David Cameron. Ein av dei som blir sikta, Andy Coulson, har tidlegare arbeidd som mediesjef for Cameron.
David Cameron har dessutan tette band både til Rupert Murdoch og Rebekah Brooks. Saka har starta ein heftig debatt om kva som bør vera grensene mellom politikk og media i Storbritannia.