Trondheimsolistenes Blu-ray «Souvenir», med musikk av Peter Tsjajkovskij og Carl Nielsen, inneheld ikkje berre stereolyd og surround- eller 5.1-lyd, men også spor i lydformatet Auro-3D, som inneber 9.1-lyd – for avspeling i ni separate høgtalarar.
– Vi famlar framleis med omgrepa
Når ein vel å kalle det nye lydformatet «3D-lyd», reknar ein vanleg stereolyd som eindimensjonal, medan surroundlyd med høgtalarar på sidene og bak lyttaren vert rekna som todimensjonal. 3D-lyd inneber at ein også tek i bruk høgdedimensjonen.
Ved avspeling av 3D, eller «9.1-lyd», er fire høgtalarar plassert over dei andre fem i «vanleg» 5.1-surroundavspeling. Omgrepa er ikkje endeleg spikra, forklarer Morten Lindberg i 2L:
– Perspektiva er så ferske i ein kommersiell samanheng at vi som produsentar framleis famlar med omgrepa, seier Lindberg til NRK.no.
– Surround med høgde, 3D-lyd og sfærisk lyd er ulike alternativ, men eg trur 3D-lyd er eit dekkjande omgrep for alle variantar.
– Eit tillegg for eit svært eksklusivt publikum
Morten Lindberg ser ikkje for seg at dei nye systema for 3D-lyd får stor utbreiing i dei tusen norske heimar med det første:
– Det er 5.1 surround og stereo som er grunnformatet i våre produksjonar – alt ut over dette er en leik med framtida, seier han.
– For den tradisjonelle musikkmarknaden er 5.1 framleis ein høg terskel. Men heimekino er i sterk vekst, og mange har oppdaga moglegheitene dette gir for musikkopplevinga. Når vi no også implementerer høgdeformatet, er dette eit tillegg for et svært eksklusivt publikum.
Først og fremst aktuelt for kinoanlegg
Sjølv dei mest dedikerte lydfrikane vil ikkje få fullt utbytte av 2L-innspelinga på denne sida av nyttår. Det er først og fremst i kinosamanheng konseptet er interessant i første omgang:
– Utstyr som kan dekode 9.1-lyd vil truleg ikkje vere tilgjengeleg for vanlege forbrukarar før godt inn i neste år. I første omgang vil formatet verte demonstrert i kinoanlegg over heile verda.
Kinoar er no i ferd med å teste ut neste generasjon av surroundlyd. I tillegg til belgiske Galaxy Studios' Auro-3D er amerikanske Dolby på banen med sitt Dolby Atmos. 2Ls innspelingar vil fungere også i sistnemnde system:
– Kvart merke vil bruke sine eigne algoritmar for å pakke data, men innhald produsert i ekte 3D vil i stor grad vere kompatibelt med dei fleste variantar, seier Morten Lindberg.