Seksmannsbandet Hanggai gav torsdag sin første konsert i Noreg, under Oslo World Music Festival. Bandet bur i Beijing og har fans over heile verda, men dei musikalske røtene deira er umiskjenneleg mongolske – nærare bestemt frå den kinesiske provinsen Indre Mongolia.
Hanggais bandleiar Ilchi.
Foto: Hilde Bruvik / NRK– Eg budde i Indre Mongolia til eg var tolv år, då eg flytta til Beijing, seier bandleiaren Ilchi.
– Men eg vart sterkt påverka av kulturen eg vaks opp i, og lengta tilbake.
Namnet Hanggai står for eit idealisert, mongolsk steppelandskap, og Ilchi har sjølv gode minne frå dei mongolske steppene.
– Om sommaren reiste vi ofte rundt på steppene til hest i lag med nomadane, vi song og hadde det fantastisk, seier Ilchi.
Frå pønk til strupesong
Ilchi starta si musikalske karriere som frontfigur i pønkbandet T9, og fleire av medlemmane har tidlegare spelt i «reine» rockeband. Låtane til Hanggai er basert på mongolsk folkemusikk, men uttrykket ber sterkt preg av musikaranes rockebakgrunn.
– Vi har mange inspirasjonskjelder innan vestleg rock, seier Ilchi.
– Metallica, Led Zeppelin, Sex Pistols, Nirvana ... dei banda som er store her, har vi nok høyrt på, vi også.
Då han reiste tilbake til Indre Mongolia, lærte han seg tradisjonell strupesong, og det var der han møtte fleire av dei noverandre bandmedlemane.
Her kan du sjå Hanggai spele «Xig Xile» i Musikkredaksjonen:
Rikt minioritetsmiljø i Beijing
– Det er ikkje vanskeleg å promotere mongolsk kulturarv eller musikk i Kina, seier vokalisten Hurcha.
– Overalt i Kina kan ein finne kunstnarar frå ulike etniske minioritetar, og i Beijing er mangfaldet av minioritetsmusikk stort. Men den mongolske musikken stikk seg nok litt ekstra ut, og vi skiljer oss i tillegg ut ved at vi tek denne musikken ut i verda.
Hurcha, vokalist i Hanggai.
Foto: Hilde Bruvik / NRKHanggai spelte torsdag hus på Rockefeller i Oslo, der dei delte scene med det norske bandet Adjágas.
- kan du høyre konserten frå Rockefeller 4/11.
-
kan du lese NRKs melding av cden «Introducing Hanggai».
- kan du lese meir om Oslo World Music Festival.
Oslo World Music Festival varer til og med søndag. Den spanske flamencosongaren Diego El Cigala held avslutningskonserten i Oslo Konserthus, der P2s Jungeltelegrafen har spesialsending.
