Papa Wemba var ein av Afrikas mest kjend musikarar. Fleire tusen menneske hadde møtt opp i Abidjan i Elfenbeinskysten for å høyre han synge.
Midt under konserten kollapsa Wemba på scena. Han vart raskt køyrd til sjukehus, men legane klarte ikkje å redde han.
Wemba vart berre 66 år gamal. Ifølgje The New York Times verka han frisk då han hadde møtt journalistar nokre dagar tidlegare. Årsaka til at han kollapsa og døydde er enno ikkje kjend.
– Stort tap for Afrika
Papa Wemba har spelt ei viktig rolle i å modernisere afrikansk musikk. Blandinga av afrikanske, cubanske og vestlege rytmar er blitt ein av Afrikas mest populære musikkstilar.
– Han er eit stort tap for heile landet og heile Afrika, sa kulturministeren i Den demokratiske republikken Kongo, Baudouin Banza Mukalay.
Mukalay framheva Wemba som eit førebilete for kongolesisk ungdom, og ein som har vore til stor inspirasjon for mange.
Tok rumbaen ut i verda
Det eigentlege namnet hans var Jules Shungu Wembadio Pene Kikumba. Han var fødd i 1949, og starta å synge i religiøse kor.
Den musikalske karrieren hans skaut fart då han som 20-åring vart kjend med bandet Zaiko Langa Langa i 1969. Dei utfordra posisjonen til dei store musikalske heltane som til dømes Tabu Ley og Franko & OK Jazz, ved å gjere kongolesisk populærmusikk meir moderne.
På 1980-talet tok Wemba europeiske dansegolv med storm med sin høgenergiske «soukous». Med eit nytt band, Viva La Musica, flytta han til Paris, og bidrog til at kongolesisk musikk òg vart populært utanfor Afrika.
Forutan den musikalske påverknaden, var Wemba òg eit moteikon. Han vart inspirasjon til ei kulturrørsle, som vart kjend som «Les sapeurs». Denne subkulturen består hovudsakeleg av unge menn som kler seg i dyre dressar og luksuriøst tilbehøyr, noko som er ein sterk kontrast til det miljøet dei lev i.