Grøssarbølgje på kino

Det norske kinopublikumet har dei siste to åra blitt skremt av ei norsk grøssarbølgje på kino.

Død Snø og Skjult er to av årets filmar som har hatt stor suksess. Denne veka er det premiere på den tredje norske grøssaren i år, Snarveien.

Meir lidenskap enn pengespørsmål

Severin Eskeland debuterar som spelefilmregissør i grøssaren Snarveien 31. juli. Filmen går inn i rekka av norske filmgrøssarar som starta med Fritt Vilt i 2006.

Grøss- og skrekkfilmar har synt seg å vere god butikk. Men Eskeland avviser at filmdebuten Snarveien er ein snarveg til suksess.

- Eg trur norske filmskaparar lagar filmar som dei verkeleg vil lage. Mange norske regissørar har skrive si eiga historie. Eg går ikkje i noko fotspor, for grøssarsjangeren har vore i blodet mitt sidan eg var tenåring. Det er meir ein lidenskap enn eit pengespørsmål, seier debutanten.

Oppblomstring av sjangerfilm

Fem norske filmgrøssarar har fått støtte av Norsk filminstitutt dei to siste åra. Men direktør Nina Refseth fryktar ikkje at det blir produsert for mange grøssarar eller at norsk film vert oppfatta som einsidig.

- Dette er snakk om ein sjangerfilm som har eit avgrensa repertoar. Vi har ein til to norske skrekkfilmar i året. Det er ikkje spesielt mange. Så som sjangerfilm så synest eg ikkje det er eit dårleg teikn, seier Refseth.

Christian Sinkerud er produsent i Fantefilm, selskapet bak Fritt vilt-filmane. Sinkerud trur ikkje det berre er grøssarfilmen, men sjangerfilm generelt som endeleg er i ferd med å blomstre opp i Noreg.

- Dette er meir eit symptom på at ein ynskjer å lage tydelege sjangerfilmar. Det er ikkje nødvendigvis skrekkfilm som kjem til å vere den regjerande sjangeren i all framtid, seier Sinkerud.