Dette må du få med deg under Festspillene i Bergen

Festspillene i Bergen startar onsdag med opningsseremoni på Torgallmenningen og opningsførestellinga Oedipus Rex i Grieghallen.

I løpet av 15 dagar skal rundt 150 arrangement gjennomførast – dei fleste konsertar, men også mange dans- og teaterførestellingar.

Unikt ungdomsorkester frå Venezuela

I Venezuela har ein gjennom drygt 35 år bygd opp eit unikt opplæringssystem for musikk som vert kalla El Sistema, og i dag får fleire hundre tusen born opplæring, dei fleste frå fattige kår. Caracas Ungdomssymfoniorkester representerer kremen av dei unge musikarane.

– Denne konserten er eit must, og kjem til å verte ei unik oppleving, seier Hovedscenens programleiar Arild Erikstad.

– El Sistema-orkestera har ein heilt unik spelestil og speleglede som garantert smittar over på alle som høyrer på, meiner NRKs konsertmeldar Ragnhild Veire.

Caracas-orkesteret skal mellom anna spele Dmitri Sjostakovitsj' 10. symfoni under konserten i Grieghallen 4. juni, der også Norsk Barnesymfoniorkester tek del. El Sistemas grunnleggjar José Antonio Abreu skal halde foredrag same dagen.

Fiolinverdas superbestemor

Ida Haendels eksakte alder er ukjent, men fødselsåret vert oppgitt til 1928, og ho debuterte som konsertfiolinist på 1930-talet.

– Det vert spennande å høyre korleis Ida Haendel spelar i dag, seier Arild Erikstad.

– Det er uvanleg og svært imponerande av ein fiolinist å kunne halde fram som utøvar på dette nivået så lenge som ho har gjort.

5. juni spelar Haendel Brahms dobbelkonsert med Oleg Kogan i Håkonshallen, og 6. juni spelar ho Vivaldis konsert for fire fiolinar, i lag med dei norske fiolinistane Vilde Frang, Guro Kleven Hagen og Arve Tellefsen i Grieghallen. Dalasinfoniettan, Oslo Camerata og dirigent Bjarte Engeset er med på begge konsertane.

Norsk stjernemønstring

Festspillene i Bergen er, mellom mykje anna, ei storstilt mønstring av dei fremste norske solistane.

Truls Mørk og Håvard Gimse skal halde to konsertar med Beethoven-sonater 26. og 27. mai, Tine Thing Helseth er solist med Svenska Kammarorkestern 28. mai, og fiolinisten Anders Kjellberg Nilsson skal kappast med fire nordiske konkurrentar om Den norske solistprisen, med finale 29. mai.

Tragedien over alle tragedier

Både Arild Erikstad og Ragnhild Veire har store forventingar til den nye oppsetjinga av Igor Stravinskys opera Oedipus Rex, som Festspillene produserer i lag med Den Nye Opera.

– Stravinskys versjon av tragedien over alle tragedier er gripande, seier Veire.

– Arketypene er lett gjenkjennelege og sterkt framstilt gjennom den mektige og arkaiske musikkstilen. Viss hovudrolleinnehavarane leverer sine krevjande solistparti, og førestellinga unngår å bli for statisk, kan dette verte eit av festivalens høgdepunkt.

Lynrask Liszt-pianist

Av dei utanlandske solistane som kjem til festivalen, er det den russiske pianisten Evgeny Kissin det knyter seg størst forventingar til. Han held konsert i Grieghallen 31. mai, med berre musikk av 200-årsjubilanten Franz Liszt på programmet.

– Å høyre Kissin spele Liszt bør bli ein «høydare», meiner Arild Erikstad.

– Kissin er på mange måtar vår tids mest utprega virtuos på klaveret. Det er ikkje mange pianistar som spelar fortare enn han!

39-åringen Kissin er ikkje den einaste som skal spele Liszt under Festspillene – Ragnhild Veire gler seg også til den georgiske 23-åringen Khatia Buniatishvilis konsert i Håkonshallen 2. juni.

– Buniatishvili er eit ungt stortalent som spelar heilt annleis og meir eksentrisk, seier Veire.

På Festspillene i Bergens nettsider finn du ei komplett oversikt over førestellingane dei komande vekene.