I KORK er dei begeistra over å ha fått tak i ein dirigent som er etterspurt over heile verda, og det kan hende musikken til Grieg og dei andre norske komponistane får nye latinske tolkingar når NRKs orkester får sjefdirigent frå Peru.
Kringkastingsorkestret fekk nyleg dei siste detaljane på plass i avtalane med sin nye sjefdirigent, som tek over orkesteret frå 2013/2014-sesongen. Harth-Bedoyas første møte med orkesteret fann stad under konserten med sopranen Renée Fleming hausten 2010:
– Det oppstod ein veldig god kjemi mellom dirigent og orkester, både personleg og musikalsk, seier Rolf Lennart Stensø.
– Han hadde svært kort prøvetid på seg før konserten, men jobba godt og det gav eit fantastisk fint resultat.
Pådrivar for amerikansk kulturarv
Rolf Lennart Stensø er glad for at avtalane med Harth-Bedoya er på plass:
– Han har ein imponerande CV – han har dirigert dei beste orkestera i USA og spelt inn cd med Chicago Symfoniorkester. Det er veldig viktig for orkesteret å kunne bli sett utanfrå, av ein dirigent med så brei bakgrunn, seier han.
Peruanaren har markert seg med eit sterkt engasjement for den musikalske kulturarven frå det amerikanske kontinentet, mellom anna som initiativtakar til prosjektet «Caminos del Inka», som også er blitt cd.
Høyr Miguel Harth-Bedoya fortelje om Caminos del Inka-prosjektet:
Første konsert i november
KORK sin noverande sjefdirigent, danske Thomas Søndergård, er på veg til stillinga som , og held avskjedskonsert 24. mai i år. Harth-Bedoya tek formelt over først frå hausten 2013, men kjem også til å dirigere konsertar med KORK i november og juni i 2012-13-sesongen.
