– Eg er lei av heile rettssaka og slik skal det halde på i månadsvis, seier fiskar Elias Bakkebø til NRK.no.

Allereie etter dag ein av rettssaka mot Anders Behring Breivik er han lei.

– Kor lenge skal vi verte fora med dette, sier han oppgitt.

• Følg rettssaken her
• Første dag av 22. juli-rettssaken

Historisk rettssak

Mandag starta Norges største rettssak i fredstid . Saken varer i 10 veker framover. Rundt 2000 vil følgje saka frå Oslo tingrett og dei 17 lokale rettssalane. Om lag 800 av desse er journalistar og fotografar.

For fiskar Elias Bakkebø er 16. april ein heilt normal dag. Som vanleg har han vore ute med sjarken sidan klokka 06.00.

No ligg han til kai i Ålesund og sel fersk torsk. Om bord i sjarken har han verken internett eller fjernsyn. Men radio har han. Den er skrudd av, for fiskaren orkar ikkje høyre om Anders Behring Breivik.

– Eg trur folk flest får nok av rettssaka. Og eg forstår ikkje vitsen med at skular og barnehagar skal engasjere seg, seier Bakkebø.

• – Breivik øydela forferdeleg mykje
• –Pass ekstra godt på barna
• – Vanskelig å arrangere fylkesting

Altfor lang tid

Måsane hyler og skrik rundt båten til Bakkebø. På land står fleire kundar i kø og temaet dei diskuterer i dag er sjølvsagt rettssaka.

– Eg er lei av rettssaka før ho har byrja. Det er skandale at dei kan halde på så lenge og at det skal koste så mykje. Tenk korleis det ser ut på norske pleieheimar, seier Jan Ingebrigtsen.

Han meiner at styresmaktene burde ha brukt pengane annleis.

Slitsamt

Liv Hole er ute og går tur. Ho kjem til å følgje med, men synest det vert for mykje merksemd kring saka.

– Det er slitsamt å høyre på dette om att og om att. Ein blir deppa og redd av alt det negative, seier Hole.

• Setter av drøye 100 millioner kroner til 22. juli-rettssaken
• Stoltenberg: - Viktig at den tiltalte får forklare seg i retten

Forstår folket

Kjetil Gjøen frå dommarane si mediegruppe, forstår at folk synest at dei får for mykje informasjon gjennom rettssaka

– Saka er så alvorleg at den krev ein grundig gjennomgang. Vi må sikre for ettertida at vi ikkje sit att med spørsmål som ikkje er svara på, seier Gjøen. Fordi dei fornærma skal få vite kva som skjedde og også kome til orde, vil saka ta tid, og dermed vert det også kostbart.

Underviser barna

På Dronning Sonjas plass i Ålesund har Redningsselskapet eit undervisningsopplegg for barneskuleelevar i dag. Her skal dei lære sjøvett, og medan nokre av barna er ute i småbåtar, står Harald Teigene på land og viser ei elevgruppe korleis dei skal knyte båtmannsknop.

–Sjå, dersom eg tar tauet under, vert det ein kjerringknute, demonstrer han.

Han synest rettssaka får altfor mykje plass.

– Den mediedekninga Anders Behring Breivik ikkje skulle få, har han fått, seier Teigene.

Orkar ikkje sjå

Småbarnsmor Lene Husevåg er ute og trillar i det fine vêret. Ho klarer ikkje sjå på tv.

– Eg vil ikkje sjå eller høyre om han. Eg vil berre at han skal fengslast og site der til han rotnar, seier Husevåg.