Universitetslektor i informatikk ved Universitetet i Oslo, Gisle Hannemyr skjønnar lite av Pirate Bay-salet.
Dobbeltkommunikasjon
Universitetslektor ved Universitetet i Oslo Gisle Hannemyr seier til Kulturnytt at han ikkje skjønnar greia.
Foto: Gisle HannemyrHan meiner det er merkeleg at partane ikkje frontar ein felles presentasjon der dei forklarar kva handelen går ut på.
- The Pirate Bay seier at dette er noko dei gjer for at nettstaden skal kunne halde fram som før. I oppkjøparen si pressemelding kjem det fram at dei ynskjer å tilretteleggje for ein lovleg forretningsmodell, der ein deler inntektene med opphavsrettseigarane, seier Hannemyr.
- Det er merkeleg at dei dobbeltkommuniserer, meiner Hannemyr vidare.
- I tillegg er det merkeleg at Global Gaming Factory X er villig til å betale 60 millionar kroner for noko som berre er eit varemerke. Særleg når forretningsmodellen er kjent ulovleg i ein rettsinstans, seier Hannemyr.
Låg aksjekapital
Og uromomenta ved kjøpet stoppar ikkje der.
- Det ser ikkje ut til at kjøparen har pengar. Aksjekapitalen deira er låg. Eg lurer på kor kjøpesummen, der halvparten skal betalast i kontantar skal kome frå, seier Hannemyr.
Lovleg løysing
Også Torgeir Waterhouse i IKT Norge meiner at framleis er mykje som er usikkert rundt salet av nettstaden. Men likevel er han positiv.
- Dette viser at ein må tilpasse seg den nye tida. Det er framleis eit langt løp, men ei viktig dreiing mot ei lovleg løysing, meiner Waterhouse.
Kva synest du om salet av The Pirate Bay?
