Historikarar reagerer på at juryen rosar boka for rikhaldig kjeldemateriale, sjølv om den berre baserer seg på andre bøker.
Arnfinn Moland er historikar og dagleg leiar på Norges Hjemmefrontmuseum. Han stussar over omtalen av boka.
- Utan å ta stilling til nominasjonen så synes eg at omgrepet «uvanleg rikt kjeldemateriale» er feilaktig, seier han.
Basert på andre bøker
Boka "Nordfronten - Hitlers skjebneområde” er skriven av redaktør i avisa Nordlys, Asbjørn Jaklin, og tek føre seg andre verdskrigen i nord. Den er nominert til Brageprisen under kategorien faglitteratur.
"Nordfronten" er nesten utelukkande basert på bøker skrivne av andre forfattarar, rundt 200 ulike titlar, noko Jaklin har fått kritikk for. Arnfinn Moland reagerer derfor på Brage-juryen si grunngjeving.
- Du kan ikkje bruke slike uttrykk om ei bok som berre baserer seg på ein type kjelde, seier Moland.
- Når blei bøker kjelder?
Han får støtte av professor i historie, Guri Hjeltnes. I ein kommentar i VG, skriv ho:
«Juryen gir Jaklin ros for å formidle med solid journalistisk håndverk krigens gru i et nøkternt, virkningsfullt språk. Men én formulering er forunderlig: Juryen sier Jaklin har «benyttet et usedvanlig rikholdig kildemateriale» - når ble bøker kilder?»
Avviser kritikken
Redaktør i fagbladet Prosa, Karianne Bjellås Gilje, sit i fagjuryen. Ho meiner dette er historiefagleg flisespikkeri.
- Den kritikken stiller eg meg heilt uforståande til. Vi har brukt omgrepet kjelder i opphavsrettsleg tyding. At bøker ikkje er kilder, det blir i tilfelle veldig historiefaglig spissfindig, det er klart at bøker er kilder.
Om det blir Bragepris til denne boka, blir avklart i kveld.