Dei har alle ein kollega som er ramma av krisa

Mange sjøfolk er uroa over framtida når stadig fleire skip ligg i opplag. I dag var dei samla til møte i Ålesund. Rekordmange frå sjømannsorganisasjonane møtte opp.

• Les også: Havila ber ansatte gå ned i lønn
• Les også: – Vi er spente og urolige

Ifølge Stian Grøthe i Sjømannsorganiasjonen er det ingen andre plassar i landet det møtte opp like mange.

– Eg trur folk er genuint redde for framtida si og til heile den maritime næringa, seier Grøthe.

Står utan arbeid

Nærmare 20.000 tilsette i Norsk Industri står i fare for å miste jobben i år, dei aller fleste i olje- og gassnæringa. Skip i opplag fører til at sjøfolk står utan arbeid. Ein av dei som møtte var kaptein Øyvind Åkre. Han meiner det er viktig no å stå samla.

– Det er no vi må klare å bli einige om ein felles strategi slik at vi alle står igjen med styrke.

Både reiarlaga og sjøfolka slit. No ber dei politikarane om å hindre at dei i tillegg blir utkonkurrert av låglønte utanlandske sjøfolk på norsk sokkel. Kaptein Ståle Nykrem seier at følgjene av krisa er frustrerande.

– Det er mange som er veldig uroa og slit økonomisk.

Grøthe i Sjømannsorganisasjonen er klar på at norske sjøfolk skal konkurrere på lik linje med alle andre nasjonalitetar.

– Det skal ikkje vere lønnsdumping på norsk sokkel og at ikkje norske sjøfolk skal bli sett på land fordi dei møter lønningar der ute som ikkje gjer det mogleg å leve i Noreg.