Ansvar for den kristne kulturarven er no blitt ein del av Danmarks Radio (DR) sine forpliktingar overfor publikum. I førre veke underskreiv DR og den danske kulturministeren den nye allmennkringkastar-plakaten, som seier at DR spesielt skal ta vare på formidlinga av «den kristne kulturarven», melder danske aviser.
I den førre avtalen frå 2007 var DR plikta til å ta vare på «den danske kulturarven».
Åtvarar mot korstog
Dette har skapt stor debatt i Danmark.
– Det er ein måte å ta oss alle saman som gislar på i eit nasjonalistisk kristent prosjekt, seier lektor i religionshistorie ved Københavns Universitet, Mikael Rothstein, til Dagbladet Information.
– Viss ein legg seg på ei bestemt ideologisk og verdimessig line, så risikerer vi at DR ikkje lenger verkar samlande, men ekskluderande. Noko tyder på at det her ikkje berre er blitt ført mediepolitikk, men også verdipolitikk, seier han.
Kristenkravet kan bli fjerna
Den politiske opposisjonen er heller ikkje nøgde med avgjerda.
– Det er ingen grunn til å skrive noko om kristendom inn i allmennkringkastar-plakaten. Det er uttrykk for ei snever oppfatning av kva dansk kultur er, seier mediepolitisk talsmann i Socialistisk Folkeparti, Holger K. Nielsen, til Dagbladet Information.
Dersom Socialistisk Folkeparti og Socialdemokratiet får makta etter neste folketingsval, som seinast vil vere i november i år, vil dei fjerne kristenkravet. Plakaten gjeld egentlig fram til 2014.
Vil redde morgonandakta
Kulturminister Per Stig Møller har forklart at det spesielt er på grunn av morgonandakta på radioen at denne endringa er viktig.
Morgonandakta har stått i fare for å bli nedlagt, og det er blant anna for å bevare den på sendeflata at den nye formuleringa har kome til i allmennkringkastar-plakaten.
Kulturministeren seier til Dagbladet Information at han synest det er grunn til å understreke at den kristne kulturarven er ein del av den danske kulturen.
– I ei globalisert og meir konfronterande verd er vi nøydde til å presisere for oss sjølve kva vi står for, seier han.
– Lyg kristendommen ned til ingenting
Kristeligt Dagblad melder at fleire gleder seg over den nye kontrakten.
Dei skriv i ein leiarartikkel at «den nye vesle tilføyinga er eit nødvendig bolverk mot den sekularistiske tenkinga, som lyg verdien av kristendommen ned til ingenting.»
Politiken skriv derimot i sin leiarartikkel at «politikarane lurer kristendommen inn bakdøra ved å bruke public service-omgrepet. Korsriddarane i DR-styret har no fått enda ein retorisk stokk å pryle dei DR-tilsette med, dersom dei ikkje i tilstrekkeleg grad står vakt om ‘den kristne kultur’. DR skal skubbast fremst i den reaksjonære kulturkampen mot humanisme og toleranse.»
NRK-andakt
Også her i Noreg har det vore debatt om morgonandakta til NRK. Det har mellom anna blitt foreslått å la andre trussamfunn få sleppe til med forkynning på statskanalen.
– I NRK-plakaten er det slått fast at NRK skal spegle Noregs religiøse arv og mangfald av livssyn og religion i det norske samfunnet. Det er derfor ein naturleg del av NRKs allmennkringkastingstilbod at NRK formidlar gudstenester, uttalte kulturminister Anniken Huitfeldt i 2010 til Journalisten.