Sølvguttene starta sitt travle juleprogram allereie 25. november, og fram til julaftan heldt koret meir enn 50 julekonsertar. Etter den faste romjulspausen sette koret mandag i gang opptaka til årets julekonsert.
Sølvguttene syng Andrew Lloyd Webbers «Pie Jesu». Solistar er Marcus Dawson, Nils Petter Edvinson, Henrik Enger Holm og Ludvig Lohne Otterstad.
Slitne gutar
Fredrik Otterstad har dirigert samtlige konsertar i jula, medan gutane i koret vekslar på å vere med. Dei yngste i koret, som er berre seks år gamle, er med på nokre få konsertar den første sesongen. Likevel vert gutane slitnare enn elles i året:
– Vanlegvis er det masse liv og skravling på vegen heim etter konserten, seier dirigenten.
– Etter konsertane i desember er det derimot ikkje uvanleg at mange av gutane sovnar i bussen.
Les:
Lang tradisjon
«Sølvguttene synger julen inn» er mellom NRKs mest populære tradisjonar, og starta så langt tilbake som i 1965. Dirigent Fredrik Otterstad var med på sin første julekonsert som sølvgutt i 1983, og kan ikkje huske anna enn at konserten har vorte spelt inn i januar.
– Det er ei veldig praktisk ordning for oss i koret, seier Fredrik Otterstad.
– Førjulstida er frykteleg travel for oss, og det er betre å spele inn konserten no enn til dømes i oktober – no har vi jo sunge gjennom repertoaret mange gonger.
Sjå i nett-tv: Sølvguttene feirer 70 år
