Ny statistikk frå vederlagsbyrået Gramo viser at det er svært få kvinner på lista over norske musikarar som får mykje speletid på radio.
– Det er veldig synd, særleg i dag, for vi har så mange flotte kvinnelege musikarar, seier leiar i artistorganisasjonen Gramart, Elin Aamodt.
Færre kvinnelege musikarar
Statistikken til Gramo frå 2009 viser altså at norske kvinner får lita speletid på radio. Berre 9 av dei 100 mest spilte musikarane på radio er kvinner, og samla går under 16 prosent av pengane musikarane får for radiospeling til kvinner.
Tala er heller ikkje på veg oppover, men viser tvert imot ein nedgang på 2 prosent sidan 2006.
Elin Aamodt meiner det er fleire grunnar til at det er slik.
– Hovudgrunnen er at det dessverre finst færre kvinnelege musikarar enn mannlege i dag. Men denne statistikken bør vere ei oppfordring og utfordring til radiokanalane, inkludert NRK til å spele fleire kvinner.
– Dette er eit tema som dukkar opp frå tid til anna, og det er sjølvsagt ikkje bra at det er så skeivt. Men det er no ein gong slik at det er fleire menn enn kvinner som driv med musikk, og det viser att i statistikken, seier musikksjef i NRK, Knut Henrik Ytre-Arne.
– Må setje inn tiltak tidlegare
Aamodt får støtte frå Heidi Stavrum som har forska på likestilling i musikkmiljøet. Hun stadfestar at mykje av grunnen til den låge kvinnedelen, er at fleire menn enn kvinner vel å verte turne- og studiomusikarar, produsentar, komponistar og låtskrivarar. Dermed er det menn som tener pengar.
– Viss vi det skal vere eit kulturpolitisk mål med likestilling i kulturfeltet og musikkbransjen, må vi vurdere å gjere noko. Dei som vel ut kva artistar som vert spelt på radio må sjå nærare på kva dei vel, seier Heidi Stavrum.
Ho trur også at ein må ta tak i dette på eit lågare nivå.
– I det unge folk bestemmer seg for kva instrument dei skal spele, så må ein oppfordre fleire jenter til å spele bandinstrument.
Meiner sjølvtillit er stikkord
Artisten Simone Larsen, kjend frå gruppa D´Sound ligg på 44. plass på lista over musikarar som toppar radiolistene. Ho skriv også musikk for nye norske namn som Donkeyboy og Bjørn Johan Muri.
– Eg trur at veldig mange jenter har skrive musikken sin berre til seg sjølv. Eller dei vel å framføre andre folk sin musikk, og kanskje ikkje har nok sjølvtillit til eigne ferdigheiter på melodi og tekst, seier Simone Larsen.
Ho har ein klar ide om kva som skal til for å få fleire kvinner inn på lista over dei mest spelte artistane på radio.
– Eg trur at ein god dose sjølvtillit, og kanskje det å skrive for, og saman med andre kan hjelpe. Det finst inga oppskrift på såkalla airplay.
Medviten strategi i P3
I P3 har dei ein strategi om å spele meir kvinner på radio, kan musikksjef i P3 Mats Borch Bugge fortelje.
– Vi er medvitne på det å spele kvinnelege utøvarar, fordi vi vil ha dynamikk i musikken vi speler. Om lag ein tredjedel skal vere kvinner, seier Mats Borch Bugge.
Dette målet ligg dei av og til litt over og av og til litt under, denne veka er kvinnedelen på P3 28 prosent. Men dette gjeld låtar med kvinnelege vokalistar, og målet tek ikkje omsyn til om dei kvinnelege artistane er norske eller utanlandske.
– Men vi prøver medvite å backe opp norske kvinnelege artistar, fordi dei er mange færre enn mannlege musikarar, seier Mats Borch Bugge.
Han er samd i at det er eit problem at statistikken er så skeiv i eit likestilt samfunn, men for at dette skal endrast meiner han at fleire kvinner må satse på musikk.
– Ta fram gitaren, eller sett deg bak pianoet og spel gode låtar – og bevis at kvinner er like gode som menn, er oppfordringa frå Mats Borch Bugge.
Studiomusikar toppar blant kvinnene
Dorthe Dreier, som ligg øvst av kvinnene, på ein åttande plass, spelar bratsj på mellom anna plater at A-ha, Cumshots og Oslo Filharmonien. Også Cecilia Gøtestam på ein 75. plass er studiomusikar.
Elles blant dei mest spelte kvinnelege norske artistane finn vi kjende namn som Marit Larsen (67.), Lene Marlin (70.), Tone Damli Aaberge (73.), folkemusikar Kirsten Bråten Berg (80.), Mari Boine (87.) og Anneli Drecker (96.).
Det er gramo som har sett saman statistikken, som er basert på rapportar registrert per juli 2010. Statistikken omfattar radiospeling av utgjevingar på P4, RadioNorge og NRK-kanalene P1, P2, P3, distriktskontora (17 stk), Sami Radio, Klassisk, Folkemusikk, Jazz og mP3.
Under kan du sjå heile oversikta over dei mest spelte utøvarane på norsk radio. Lista inkluderer både kjende artistar, og musikarar som har vore med på innspelingar av andre sine plater.