Denne hausten har snudd opp ned på det meste for Silya Nymoen. 9. november vart ho utropt til vinnar av TV-konkurransen Stjernekamp, etter å ha framført sin eigen låt Sucka i finalen.
Les:
Etter ein hektisk månad med mykje merksemd skaper Silya denne veka julestemning for NRK sitt publikum: Torsdag song ho to av dei største juleklassikarane med Kringkastingsorkestret i Store Studio.
– Dødskult å få gjere den med Kringkastingsorkestret
Den ultimate julestemninga er for Silya knytt til veslejulaftan: Juletrepynting i lag med broren, lukta av gran og julegraut, og lyden av ei etter kvart nokså sliten vinylplate pryda av ein blid kar med nisselue:
Bing Crosby i oktober 1942, same månaden som White Christmas gjekk til topps på amerikanske hitlister.
Foto: AP– Det vert ikkje jul for meg utan Bing Crosby, seier Silya når eg møter henne nokre dagar før konserten med Kringkastingsorkestret.
– Når han syng White Christmas ... det er den beste julesongen som finst. Det må vere han som syng den. Den er så varm og fin at eg får lyst til å setje meg framfor peisen og opne julepresangar med ein gong. Å få gjere den songen med Kringkastingsorkestret er berre dødskult!
– Har mest lyst til Bahamas i år
Etter at den verste Stjernekamp-stormen hadde roa seg i november, reiste Silya tilbake til heimebasen i New York for å slappe av. Det gjekk ikkje heilt som planlagt:
– Eg har ikkje så lett for å slappe av, så eg jobba mykje i studio og feira sigeren i lag med venene mine som hadde følgt med frå USA. Så var eg plutseleg tilbake i Noreg med fullt køyr i to veker. Då merkar ein plutseleg at ein er litt sliten.
Dermed er behovet for julefred ekstra stort i år, og ho reiser difor tilbake til New York allereie 22. desember – og kanskje vidare derifrå også?
– Eg har ikkje tenkt å boikotte jula, men eg kunne tenkt meg å dra til ein varm stad – eg treng litt ferie. Det kan hende eg blir i New York utan å gjere så mykje, men eg har aller mest lyst til å dra til Bahamas heilt åleine og ligge i ei hengekøye!
Sjå Silya synge The Christmas Song:
Silya syng The Christmas Song med Kringkastingsorkestret, dirigert av Terje Boye Hansen.
– Stjernekamp opna ei velkomstdør
Med to søsken som bor utanlands og reiseglade foreldre, er alternativ julefeiring blitt normalen for Silya sin familie. Løysinga for den julekjære artisten vert å fylle på med julestemning før sjølve julehelga:
– Eg tenkjer det blir førjulsfeiring med foreldra mine før eg reiser, ein treng jo ikkje vente til julaftan. Det er lenge sidan vi har hatt ei sånn ordentleg norsk jul med heile familien, eg har feira jul både i Florida, New York og New Jersey. Men eg har mange norske vener i USA og har fått ribbe likevel – eg har til og med klart å lage riskrem.
Stjernekamp-sigeren har opna nye dører for Silya både i Noreg og i USA – utan at ho vil røpe kva som er på gang «der borte». Her i Noreg er det duka for konsert på Sentrum Scene 25. januar og truleg plateslepp i mars. Og det er heilt annleis å vere Silya på norsk jord etter denne hausten:
– Stjernekamp vart noko mykje meir enn eg trudde det skulle bli. Eg skulle berre svippe innom Noreg, og trudde ikkje eg skulle vere med til slutten. Men utover i konkurransen vart den så viktig for meg, og etter at eg vann, har eg fått svært mykje fin tilbakemelding frå folk. Stjernekamp har liksom opna ei slags velkomstdør heim til Noreg.
Du kan høyre konserten med Silya og Kringkastingsorkestret i Julemeloditimen på P1+ 21. desember kl. 15.03 eller i NRKs nettradio.
