Rutinerte komponistar på skulebenken

Sist Kjetil Bjerkestrand (58) kunne kalle seg student, var då han fullførte kyrkjemusikkstudiene ved Norges musikkhøgskole i 1978. No er han tilbake på skulebenken, denne gongen ved Høgskolen i Lillehammer.

– Det er kjempemoro å vere student igjen, seier Kjetil Bjerkestrand.

– Eg får møte eit nytt miljø, og får samstundes fagleg påfyll. Vi lærer til dømes mykje om filmmusikkhistorie, der har eg store hol i min kunnskap.

Les: Vil dyrke fram filmmusikk med norsk identitet

– Lærer mykje av kvarandre

Studiet i filmmusikk-komposisjon vart starta opp for to år sidan, og på årets kull er det seks studentar. Mellom dei er også Gisle Kverndokk (46), som i tillegg til å ha skrive filmmusikk har lang fartstid innan opera og musikal.

– Dette studiet gir meg høve til å kome ut av hola mi, sjå dagslyset og treffe andre menneske, seier Gisle Kverndokk.

– Vi har fått eit stort pensum med bøker og filmar. Men eg lærer også svært mykje av diskusjonane i klassen. Alle har mykje og svært forskjellig erfaring, og vi lærer mykje av kvarandre. Vi har blitt som ein liten klubb, og eg gler meg til dei intense dagane vi har til å prate og utveksle erfaringar.

– Håper å verte dristigare

I tillegg til førelesingar får studentane praktiske oppgåver i komposisjon. Til oktobersamlinga hadde dei fått i «heimelekse» å skrive musikk til ein om lag ti minutt lang dokumentarfilm.

– Vi kan ta større sjansar her i klasserommet enn når vi skriv noko som skal brukast kommersielt, seier Kjetil Bjerkestrand.

– Då må vi vere sikre på at det fungerer godt, her kan vi sparke til alle kantar og sjå kvar grensene går, sidan vi får dei faglege kommentarane vi treng. Normalt får ein berre tilbakemelding om at det enten funkar eller ikkje funkar. Eg håper å verte dristigare som filmkomponist etter dette studiet.

Høyr radioinnslag med utdrag frå Bjerkestrands heimeoppgåve: