Geahččit biško ja huike go Europe joavku bođii lávdái gaskaija áigge. Ii goasse leat nu ollu olmmoš leamaš dán giettis go juste dán eahkeda. Ja rockárat eai beahttán gehččiid. Oktat nubbi šlágár čuojahuvvui konsearttas mii bisttii lagabui guokte diimmu.
Olbmot lávlo ja dánso go joavku čuojahii daid eanemus dovddus lávlagiid. Maŋemus lávllan lei "The final countdown", ja go dan lávlaga álgonuohtat gullogohte, de gal olbmot measta loktanedje.
John Norum dat lea Europe. Eahpitkeahttá. Go Norum lea lávddis de ii dárbbaš galle geardde guoskestit streaŋggaide ovdal olmmoš gullá ja ipmirda manne su gohčodit oktan máilmmi buoremus gitáristtain. Ja joavkku lávlu Joey Tempest gohčoda olbmás "guitarhero" go muitala geat čuojaheaddjit leat.
Sohkadeaivvadeapmi Gaskaijarockas
NRK Sámi Radio lei áidna media mii beasai jearahallat dán máilmmibeakkán gitáristta guokte diimmu ovdal konseartta.
Norum muitalii ahte lei hui álki vástidit "juo" go bođii jearaldat ahte háliidit go sii čuojahit Gaskaijarockas. -Munnje ja rumbočuojaheaddjái Ian Hauglandai han lea dego boahtit ruoktot go bohte Davvi-Norgii, lohká Norum. John Norum lea oainnát riegádan Várggáin ja su bearaš fárrii Ruŧŧii dalle go son lei jahkásaš. Ian Haugland lea ges eret Ráissas Tromssas.
Maŋŋel konseartta áiggui John Norum deaivvadit fulkkiidisguin. Earret eará ledje su ednot ja vilbealit bovdejuvvon Levdnjii danne go Europes galggai konsearta leat doppe. Dát fuolkkit orrot Finnmárkkus, ja Norum oinnii sin árat dán jagi dalle go sus oabbá náitalii Ruoŧas. -Vaikko lean ge sin oaidnán aittoládje, de šaddá lihkká somá deaivvadit singuin fas, dadjá John Norum.
