Girječállis Rauni Magga Lukkaris leat ođđajagi dearvuođat sámi politihkkáriidda, danne go son dáhtošii seailluhit sámegiela. Lukkari dahtošii sámi politihkkáriid dán jagi vuoruhit sámi girjjálašvuođa. Jos dál ii buorránaš ruhtadilli čáppagirjjálašvuođa ovdáneapmái, de gal dáidet dálá girječállid sánit darvánit duššefal liikaliinniide muitun boahteáigge jápmangielaid dutkiide, oaivvilda son.
Sámegiella váibmoáššin 2008s
Vare sámi mánáin ja nuorain livčče vejolašvuohta "buokčalit" girjerádjosa hilduide válljet girjjiid main teaksta livččii leat sámegillii, nu lohká girječálli Inga Ravna Eira. Son fuomášahttá ođđajagi jurdagiinnis ahte son geavaha sáni "vare", dát mearkkaša dan dan ahte sámi mánáin ja nuoraid dáđibahábut ii leat dát vejolašvuohta.
Dálkkádat rievdan smiehtaha
Girjačálli Sigbjørn Skådena ođđajagi jurdagat joradit eanemusat dálkkádatrivdamis. Dás son jurddaša hui olu, jurddaša maid mii sáhtašeimmet dahkat jorgalahttit máilmmi liegganeami.
Soabalašvuohta ja dearvvasvuohta
Sátne-ja nuohttadahkki Issát Sámmul Hætta sávašii soabalašvuođa ja dearvvasvuođa ráđđet 2008:s. Son sávašii buohkaide buriid, erenoamažit sávašii sidjiide erenoamaš buorre ođđa jagi, geain vássán jahki ii leat leamaš nu buorre.
Ođđa vejolašvuođat
Deanodaga diktačálli Liv Ellen Johnsena ođđajagi jurdagat leat ahte dát jahki buktá sutnje ođđa vejolašvuođaid.
Oasttinortnet čáppagirjjálašvuhtii
Sámi dáiddáris ja girječállis Synnøve Persenis lea dušše okta sávaladat ođđa jahkái, ja dat leat dat ahte Sámediggi ásahivččii oasttinortnega sámi girjjálašvuhtii.
Ráfidivttain sávvá buori ođđajagis
Osku dagaha máŋgii ráfehisvuođa, nu geavai maiddái ovddit čuohtejagis Guovdageainnus, nu lohká diktačálli Karen Anne Buljo. Son sávvá filbmadahkai Nils Gaupii lihkku ođđa filmmain Guovdageanstuimiid birra divttain "Chicago sohkarheajat".