Jus dal galggá Mathias Harraj luohtedit, de la boahtte vahkko dat ájgge masi duodjára ienemusát diertjesti. Boahtte vahko la má márnán Jåhkåmåhken, ja dasi de "gájka" duodjára tjåhkani dágástalátjit, oasestittjat ja nuppij juoŋga láhkáj sæbrástalátjit.
– Duodjárij la dát tjuottjes ájgge. Dálla lav dán stuorra dáhpádussaj diertjestime. Ja diedon iv la dal oadtjum dagádum dav majt usjudalliv.
Oasse viessomájges
Mathias Harraj la duodje læhkám oasse bajás sjaddamis, ja vilá l sunji ájnas oasse. Dajna l de sunji luondulasj duodjuhit, ja duojes aj viessomlájbev åttjudit. Ja duodje l Mathias Harrav viessomájgev tjuovvum. Duodjáj gijnaj gå duojev dutkaj ja duodjuhij guokta jage Sáme åhpadusguovdátjin Jåhkåmåhken.
– Mån dal duodjefámiljas boadáv, ja diedon dal galgajma ietja nijbev dahkat. Agev la læhkám nav at galgajma divna dárbbagijt ietja dahkat. Dajna lav duodjáj hárjjánam, ja dajna aj duojev berustav.
Værámus mánno
– Dát mánno la værámus mánno duodjárij, ja aj ájnnasamos mánno, javllá Mathias Harr ja tjieŋodahttá dav gå la dal márnán Jåhkåmåhken boahtte vahko. Ja ájnas la Mathias Harraj dan diehti gå la vejulasj lahkke jahkesisboadov danna åttjudit. Duodden la aj ájnas mij guosská ietjas namáv oablodahttet.
– Guovvamano álgon la ájnnasamos vahkkoloahpe, ja sierraláhkáj dal duodjárij. Da la márnán Jåhkåmåhken, ja jus la vejulasj ålov dasi buktet, de la aj vejulasj lahkke sisboadov danna åttjudit.
Stuorra berustibme
Mathias Harr la virgen duodjebagádallen julevsáme guovdátjin Árran Divtasvuonan. Harr ælvvá stuorra berustimev duodjáj, ja vuojnná aj tjehpudagáv moaddásij gaskan.
Ienebuv duodjuhij, ienebuv berusti ja ienebuv dádjadi mij la duodje, ja dajna kválitehtta aj buorrán. Divna máhtukvuoda li dal vuojnnet dánna. Ja nav la geldulasj dájna barggat. Ælvvám lav aj dárbbo l dánna bagádallen, ja berustibme l aj dánna duojev oasstet. Márnán dal gávnnu. Dajna li aj vejulasjvuoda duodjárijda dán bielen aj.
Mathias Harr vuojnná vejulasjvuodajt duojen, valla jus dal Árrana duodjelanjá ja vædtsaga li sidjij gudi sihti ietjasa åvddånahttet ja duojev æládussan oadtjot, de ij sån diede. Valla duodjelanjá lij gåjt viehkken álgov dagátjit.