Suohkanstivra lea mearridan Fossbakkenii sámegielnama, muhto dasa gal eai buohkat liiko
Olbmot Loabágis Mátta-Romssas eai leat ovtta oaivilis mii livččii rivttes sámegiel namma Fossbakken gillái.
Ruŋggu historjjá searvi oaivvilda ahte Ruŋggugiera lea rivttes namma. Gielas orohat ges evttoha Bokcávuopmi livččii rivttes namma. Lars Joar ja Mai Britt Halonen ges leaba árvalan máŋga nama, nugo Guolbban ja Boksavuopmi.
Loabága suohkanstivra lea mearridan ahte Fossbakken lea sámegillii Fossbáhkku.
– Mis lei álbmotčoahkkin Fossbakken gilážis gos olbmot oaivvildedje ahte Fossbáhkku namma dát lea geavahuvvon sámegillii, dadjá Loabága sátnejođiheaddji Hege Myrseth Rollmoen.
– Mii guoddalit suohkana mearrádusa, dadjá Ard-Eirik Hermanssen, Ruŋggu historjjá searvvi jođiheaddji.