Ella Stina Eira (22) álgá goalmmát jagi studeret, ja sus lea oasseáiggebargu.
– In birge barggu haga. Livččii nohkat visot ruhta go lean máksán stohpoláiggu ja eará rehkegii, čilge Eira.
«Lånekassen», dahjege stáhta loatnakássa, máksá badjelaš 8000 kruvnna mannosaččat ovttaskas olbmui, ja dat ii leat doarvái.
iskosiin boahta ovdan ahte studeanttat golahit badjel 40 proseantta dietnasis stohpoláigui.
Studeanttat barget luomus
Ella Stina Eira lea okta dain guhte šaddá bargat geasseluomus.
– Mus lea geassebargu vuoi birgen ruđalaččat dan botta go logan. In birge dušše studeantaloanain, muitala son.
Dutkamat čájehit maiddái ahte studeanttat eai birge jus eai bargga dasa lassin go studerejit.
Sanni Næss (19) lohkagoahtá čakčat, ja lea ovtaoaivilis Eira:n.
– Mun barggan olles geasi vuoi lea valjis ruhta go álggán skuvlii, ja mu váhnen guoktá ferteba doarjut mu ruđalaččat. Dat studieloatna ii leat doarvái, muitala Sanni.
Dattetge eai leat návccat oasseáigebargui oahpposuorggi dihtii.
– Mun lean ohcan doavtterskuvlii. In jáhke nákcet bargat dasa lassin, dadjá son.
Ožžot eambbo doarjaga
Stuorradiggi lea ráhkadan plána mii galgá álkidit studeanttaid dili. Dán plána miel ožžot studeanttat eambbo doarjaga. Dán jagi ožžo alitoahppostudeanttat ja fágaskuvlla oahppit doarjaga 10 mánu ja golbma vahkko. Boahtte giđa ges guhkidit oahpahusdoarjaga olles 11 mánu.
Studeanttain geain leat bargonávccahisvuođat ja eaige sáhte bargat geasseluomus, sáhttet oažžut oahpahusdoarjaga olles jagi.