Storebrand geassáda Åajvaerie bieggafápmoáššis
Dán duođašta Storebrand NRK:i.
2022:s bijai Storebrand iežaset ceavzilisvuođaraporta vuođul Eolus vind geahčču vuollai go balle fitnodaga rihkkon Jillen-Njaarke badjeolbmuid olmmošvuoigatvuođaid Musseres Nordlánddas, Åajvaerie bieggafápmohuksemiid geažil
2023:s válddii Øyfjellet Wind AS badjelasas bieggamillorusttega Eolus Vind AB fitnodagas, ja Eolus Vind guđii prošeavtta.
E-poasttas NRK:i duođašta Storebrand ahte sii eai ruhtat Øyfjellet Wind Investments AS:a sin investeremiid olis, man Øyfjellet Wind AS eaiggáduššá
Dat mearkkaša ahte Storebrand hálddašeaddjit eai sáhte obligašuvnnaid dahje reantobáhpáriid oastit fitnodagas.
Seammás de ii leat šat Eolus Vind AB Storebrand áicanlisttus olmmošvuoigatvuođa rihkkumiid hárrái go Eolus Vind AB ii šat gula dán prošektii.
Storebrand oaivvilda Åajvaeriet bieggafápmorusttega rihkkut Jillen-Njaarke badjesápmelaččaid olmmošvuoigatvuođaid ja danin geassáda ruhtadeaddjin, čállá báŋku Storebrand e-poasttas NRKii.
Jillen-Njaarke orohat ja bieggafápmohuksen Øyfjellet Wind deaivvadeaba diggegottis miessemánu 27. beaivvi.