Váilot sámegielat doaktárat – Stine Lise gilvala beassat medisiidnaohppui

Go Stine Lise Nordsletta Somby áddjá buozai, de son dávjá finai buohcceviesus.

Dalle son vásihii dárbbu eambbo sámegielat dearvvašvuođabargiide.

– Dát lea okta stuorra sivva manne mun maid háliidan doavttirin šaddat, dadjá Stine Lise.

– Dárbu sámegielat doaktáriidda

Dál beassagohtet guhtta sámegielat ohcci UiT Norgga Árktalaš universitehta medisiidnaohppui jahkásaččat.

Dá leage ášši mainna Sámi doaktáriid searvi (SDS) lea bargan, muitala SDS stivrralahttu ja fástadoavttir Máret Lájlá Sara Nedrejord.

– Mun vásihan árgabeaivvis ahte mis váilot sámegiel spesialisttat sihke fástadoavttirin muhto maiddái doppe buohcceviesuin ja Sámi Klinihkas, muitala Nedrejord.

Vaikko Sápmái lea illusáhkan ahte oahpposajit lassánit guovttis guđa sadjái, de SDS datte dáhttu nuppástuhttit vuogi mo eriid deavdit.

– Buoremus ohccit devdet eriid

UiT prorektor Kathrine Tveiterås lohká ahte sámegielagiid oahpposajit leat dehálaččat.

– Dát dáhkida, ahte sámi servodagas šaddet eanet olbmot, geain lea gelbbolašvuohta medisiinnas, dadjá UiT prorektor Kathrine Tveiterås.

Tveiterås oaidná ahte sii, geat jo livčče ožžon oahpposaji iežaset gelbbolašvuođa vuođul, devdet davvi-norgalaš ja sámi eriid.

– Sisaváldima sáhtášii árvvoštallat baicce nuppe gežiid, addit oahpposajiid vuos stuorámus eriid vuođul, nugo oktasaš sisaváldinortnega ja davvinorgalaš eriid vuođul. Dáinna lágiin sáhtášeimmet sihkkarastit ahte eambbo sámegielagat ožžot oahpposaji, evttoha UiT prorektor.

Máhttodepartemeanta ii rievdat málle

Sihke SDS ja UiT leat evttohan Máhttodepartementii rievdadit mo deavdit eriid.

Máhttodepartemeanttas celket ahte sis ii leat áigumuš rievdadit UiT medisiidnaoahpu sisaváldinmálle.

Stine Lise mielas lea dehálaš ahte leat sierra oahpposajit sámegielagiid várás.

– Dát sámi earri addá maid seamma vejolašvuođa midjiide beassat daidda stuorra oahpuide, dadjá son.

Stine Lise muitala ahte lea gullan kommentáraid ahte earrestudeanttat eai ánssáš sajiid.

– Mun lean hui olu áiggi bidjan skuvlabargguide ja bargan ahte galggan beassat medisiidnaohppui. Mun gal dušše smiehtan ahte mus lea lihkku jos beasan sisa, juste nie mo dat eará medisiidnastudeanttatge.

Eanet ságat NRK Sámi neahttasiiddus

Les flere samiske nyheter her