NRK Meny
Normal

Son jođihišgoahtá Ruoŧa sápmelaččaid

Sámiid Riikabellodaga Per-Olof Nutti váljejuvvui odne Ruoŧa sámedikki stivra ságádoallin.

Per-Olof Nutti Ruoŧa sámedikki ođđa stivra ságádoalli
Foto: David Rydenfalk

Lea leamaš eahpesihkar geat jođihišgohtet Ruoŧa sámedikki maŋŋil mannan giđa válggaid.

Fápmu molsašupmi

Dát bellodagat stivrejit Rouŧa Sámedikki
Foto: David Rydenfalk / Sameradion & SVT Sápmi

Otná dievasčoahkkimis Staares bođii ovdan ahte fápmu molsašuvvá.

Ovddit áigodaga opposišuvdna bellodagat Sámiid Riikabellodat, Guovssonásti, ja Vuovdega stivregohtet ovttas oktatáirras bellodagaiguin Samerna ja Sámi álbmotjienastanbellodagain. Nu ožžo sii eanetlogu 17 áirasiin.

Ilus ja giitevaš

Per Olof Nutti lea boazodoalli Guhttásis eret ja lea 90- logu rájes oasálastán sámi politihkas.

- Lean ilus ja giittán sin geat leat dorjon mu. Sámi álbmot lea válggaid bokte čájehan ahte sii gáibidit rievdadusa sámi politihkas ja dát lea maid min ulbmil.

Mannan válgaáigodaga stivraságádoalli Håkan Jonssona bellodat Jakt-och fiskesamerna šaddet dál opposišuvdnii.

Ruoŧa sámediggeválggat čađahuvvojedje miessemánus. Ođđa stivraságádoalli Per-Olof Nutti lohká ahte sii dan rájes leat šiehtadallan ovttasbargobellodagaiguin.

-Mii leat válggaid rájis šiehtadallan Guovssonásttiin ja vuovdaegiin. Politihkas ferte addit ja váldit ja min ovttasbargu orro doaibmamen.

Sávvaba lihku ja giitiba ovddit jođiheami

Norgga sámediggepresideantta Vibeke Larsen sávvá lihku ođđa jođiheaddjái.

- Mon sávan davviriikalaš ovttasbargu šaddá ain beaktileabbo

Norgga Sámiid Riikasearvvi presideantaevttohas Aili Keskitalo giitá ovddit jođiheami ovttasbarggus ja sávvá lihku ođđa stivrii.

- Mon lean sihkar ahte davviriikkalaš ovttasbargu vuoruhuvvo.