NRK Meny
Normal

Musea balddiha mánáid

Sotnabeaivve lágiduvvojit "Soigosat" guđát geardde Sámiid Vuorká-Dávviriin Kárášjogas. Stuorát ja smávit mánát besset dalle vásihit sihke ilu, suohttasa ja soaiggeheami.

Dákkár ja sullasaš gopmiid oainnát Soigosiin.

Mánát besset ieža searvat Soigosiidda.

Foto: Astrid Helander, Min Áigi

Davveoarje sámimuseasiida, Kárášjoga Mánáid Valáštallanskuvla, Kárášjoga kulturskuvla ja Info Nuorra lágidit guđát geardde "Soigosat" suohtastallaneahkeda. Doalut álget vuojadanhállas ja dasto joatkašuvvet suohtastallamat Stáluguolbanis.

"Árdnahávdde ohcan"

Árdnahávdde ohcan"
Foto: Sámiid Vuorká-Dávviriid preassagovva

Dán jagi fáddá lea "Árdnahávdde ohcan". Dáinna Sámiid Vuorká-Dávvirat hálidivččii joatkit dološ máinnastanárbevieru ja ođđa vuogi mielde čájehit iešguđet máinnashámiid, gopmiid ja eará eahpeduođalaš hámiid.

Dolin máinnastedje sevdnjes eahkediin. Soigosiin mánát besset ieža oassálastit máidnasiin ja leat oassi muitalusain.

- Mii doaivut ollesolbmot ožžot hálu muitališgoahtit mánáide daid máidnasiid maid sii mánnán leat gullan, vai sámi muitalanárbevierru jaotkašuvašii. Dan čállá Sámiid Vuorká-Dávviriid Berit Åse Johnsen preassadieđáhusastis.

Kulturvahkku

"Soigosat" leat oassin Kárášjoga gieldda kulturvahkus. Dán vahku fáddán lea "Rájáidgaskasaš kultuvra". Danne lea dán jagi Soigosiin olggobeale Sámi guossi máinnashápmi "troll" guossin.

Mátki čuovvu bálgá museavuovddis gos balddonas ja soaiggus dáhpáhusat sáhttet deaividit. Mánát besset oahpásmuvvat sihke veiggiide ja eará balddonasaide. Museas almmatge jieđđejit stuorámus njoammelhiihtamiid.

"Állet bala! Doppe leat maid šiega máinnashámit!"