Sávvá vuoitit johttipokála Suoma stuorámus gilvvuin

Maŋemuš 15 jagi lea Niillas Jovnna Länsman (30) gilvvohallan čáhcekrossagilvvuin, muhto dál lea vuovdan vuoitoskutera.

Guovdageaidnulaš áigu lihkká gilvalit Suoma stuorámus gilvvuin.

Geassimiehta lea son johttán čáhcekrossagilvvuin, muhto lea gáttis čuvvon su olbmá Eskil Hætta (18) go gilvvohallá.

– Mun lean leamaš sutnje mekanihkar ja manager. Lean veahkehan divvut ja skruvvet čoahkkái čáhceskutera sutnje, muitala Länsman.

Skutera maid leaba veahkkálaga skruvven leage skohter maid Länsman lea ožžon luoikkasin Tahko-gilvvuide.

– Mun jáhkán ahte skuter gal manná seamma bures, mun han lean huksen Eskila skutera veahkkin. Nu ahte skuter gal dáidá leat seammalágan go dat mii mus lea ovdal leamaš, dadjá Länsman.

Tahko-gilvvut leat Suoma stuorámus čáhcekrossagilvvut, ja lea vuollel diibmosaš biilamátki dobbelis Kuopio gávpoga, Lulli-Suomas.

– Mun lean vuoitán doppe 2021 ja 2022, nu ahte jus dán jagi nagodivččen vuoitit gilvvu, de vuoittán johttipokála, muitala Länsman.

Johttipokála vuoitá son guhte nagoda vuosttažin vuoitit gilvvuid golmma háve maŋŋálaga.

Länsman ii leat vuos vuodjan Eskila skohteriin.

– Mun in gal boađe skuteriin vuodjit beare ollu ovdal daid gilvvuid. Guokte beaivvi beasan hárjehallat dáinna ovdal gilvvuid. Dan maŋŋel searvvan Tahko-čáhcekrossii.

Krossa lágiduvvo suoidnemánu 21.- 22. beaivve.

Árvvoštallá heaitit

Länsman lea olu jagiid geavahan návccaid ja áiggi čáhcekrossagilvvuide.

Dán geasi son lea dušše geahččan gilvvuid ja dorjon iežas olbmá.

– Gal dat lea veaháš ártet čuožžut gáttis ja dušše geahččat, muhto gal dat manná bures.

Länsman ii áiggo vuoruhit gilvvohallat čáhcekrossas.

– Go vuodjá ná guhká ja aistton geasi lea hommen dainna čáhcekrossain, de gal manná olu áigi dasa. Ja dat lea divrras valáštallan.

Niillas Jovnna Länsman ii dieđe joatkka go son.

– Ferte oaidnit dál movt dat manná Tahko ja Lycksele gilvvuin. Movt dat orro fas vuoddjit. Ferten dan maŋŋel oaidnit, dadjá son.

Stuora jáhkku olbmái

Ođđa ja nuorra vuoddji Eskil Hætta ii dieđe leago su skuter buoret go Niillas Jovnna ovddeš skuter.

Lihkká son ii eahpit ahte iežas olmmái vuoitá gilvvuid, vaikko son ii leat vuoruhan hárjehallat dán geasi.

– Son gal lea oalle čeahpes vuoddji, nu ahte ii galgga leat váttisvuohta, lohká Eskil.

Hætta muitala ahte Niillas Jovnna lea hui čeahpes vuoddji. Iige loga oba gažaldahkange leago Länsman buoret vuoddji go son.

– Dušše moadde vahku maŋŋel go lean ovttasbargan suinna, de lean oahppan nu olu, ja juohke beaivve ain oahpan ođđa diŋggaid sus, dadjá Hætta.

Länsman dadjá ahte lea somá go olbmás lea buorre doaivva sutnje.

– Dat lea somá go oaivvilda ahte mun lean buorre vuoddji, muhto leange dieđus veaháš eambbo dovddiidus čáhceskutergilvaleamis, go mun han lean vuodjan ollu.