Med 220 deltakarar fordelt på 24 klubber, blei noregeshistoriens største NM i handbak nyleg arrangert.
Og dama som leverte aller sterkast av kvinnene var sørlendingen Elise Ågedal frå Lindesnes handbakklubb. Ho stakk nemleg av med den fyrste kongepokalen i handbak for kvinner.
– Det var utruleg stort. Eg så ikkje heilt den kongepokalen komme, så det var stas, seier Ågedal.
Og ikkje nok med det. Det var venstrearmen som blei hennar sterkaste kort.
– Merkeleg nok så er venstrearmen min sterkast ja, men eg er høgrehendt, seier ho.
Alexander Heimdal vann på herresida, mens Elise Ågedal frå Lindesnes håndbakklubb blei beste kvinne.
Foto: Tom MælandTrener på teknikk
Dei fleste av oss har bryte ein handbak eller to i godt lag, og tenker kanskje at det held å vere sterk i den noko utradisjonelle sporten. Men for å bli skikkeleg god så trengst det meir enn rå styrke.
– Eg trur det er ei god blanding. Det er klart at ein må vere sterk, men teknikk har utruleg mykje å sei.
– Korleis øver du på det tekniske?
– Det er jo mest bordtrening da. Det må til. I tillegg blir det nokre timar på treningssenteret.
Ågedal tok to gull og kongepokalen.
Foto: Tom MælandIngen juksing
Når ein bryt handbak på hobbybasis kan det vere freistande å la olbogen skli nokre centimeter til høgre for å få ein litt betre vinkel på armen, men slike knep er det ikkje rom for i ein noregsmeisterskap, skal vi tru den ferske meisteren.
– Det er veldig vanskeleg å jukse, for ein har gode dommere som følgjer med.
I starten så er det ikkje lov til å bevege nokon ting.
Og for dei som ikkje er kjend med handbak i profesjonelle former, så har utøvarane olbogen på ei pute.
– Når dei seier «ready go», så kan du bruke heile puta til å skli. Du kan bruke handleddet og heile kroppen, så det er ganske annleis enn folk trur at det er, forklarer meisteren.
Historisk siger
Erling Midttun i Vestland Brytekrets, og var medarrangør i noregsmeisterskapet. Han er full av lovord om vinnaren frå Sørlandet.
– Elise gjorde ein fantastisk innsats! Ho er ein flott utøvar og eit stort talent i ein klubb som gjør det veldig bra, seier han.
I tillegg blei Ågedal frå Lindesnes historisk som mottaker av kongepokalen.
– Det er jo fyrste gongen at ein har kunne delt ut den for senior dame. Så dette er eit stort stykke historie, seier Midttun stolt.
Og sporten har økt jamt og trutt på kvinnesida dei siste åra. I 2019 var det tre jenter med. I år var det rundt 30.
– Det seier jo noko om at sporten blir større og at fleire damer kjem inn, seier Ågedal.