NRK Meny
Normal

Ii oktage sámi skearru nominerejuvvon

Jahki 2008 orro šaddamin stuorra musihkkajahkin Sámis, ainjuo vuos skearrologu dáfus. Jus Spellemann-nominašuvnnaid anášii vuođđun, de diimmá jahki ii lean gal ráhpa kvalitehta dáfus.

Ártna prográmmajođiheaddji Wenche Marie Hætta čájeha diimmá sámi skearruid.
Foto: NRK

 Dál lea čielgan makkár ártisttat ja skearrut leat nominerejuvvon jagi 2007 Spellemannbálkkašupmái. Sámi skearrut lávejit dábálaččat gilvalit "Åpen klasse" vuolde.

Diimmá sámi musihkkabuktagiin ii leat almmatge oktage skearru almmuhuvvon dien dahje eará luohkáide.

Mari Boine lea golbmii vuoitán bálkkašumi dán luohkás. Dasa lassin leaba Frode Fjellheim ja Niko Valkeapää vuoitán oktii goabbáge.

Skuordna musihkkajahki

Spellemannbálkkašupmái sáhttet dieđihuvvot buot norgga skearrut mat leat almmuhuvvon norggas 05.12.2006 - 03.12.2007 áigodagas.

Diibmá ii almmuhan oktage daid dovddumus sámi ártisttain skearru. Ruota beale Sámi násti Sofia Jannok almmuhii skearru "Čeaskat", muhto dát skearru diehttelasat ii livčče sáhttán gilvalit Spellemannbálkkašumi alde.

Ii ovddeš Sámi Grand Prix ja Liet-Lávlut gilvvuid vuoiti Johan Kitti ge livčče dohkken dán gilvui. Jannok ja Kitti skearrut oainnat eai leat norgga skearrut.

Muđuid sáhttit namuhit dáid skearruid: Sagittarius "Noaidi", Biret Margrehte Oskal "Mátki", Bonggu Ánte "Sámi álbmot", Karen Anne Buljo "Ábifruvvá" ja Sámi Grand Prix 2007-skearru.

Dát leat nominerejuvvon

Loga maiddái: Stuorra CD-jahki