Ođasmahtton: Dan rájes go dát artihkal čállojuvvui, de lea dieđihanáigemearri juoiganoassái rievdaduvvon juovlamánu 21. beaivái. Dan leat divvon maiddái artihkkalis.
Geat loktejit luođi ja sámegiel lávlagiid Davviriikkain boahtte jagi?
Jus dus lea lávlla dahje luohti, de soaittát leat don. Juovlamánu 1. beaivve rádjai 2022, sáhtát dieđihit lávlagiid 2023 Sámi Grand Prixii (SGP), luđiid fas sáhtát dieđihit juovlamánu 21. beaivvi rádjai.
Leat go don gearggus searvat sámi stuorámus musihkkagilvui?
Stuorámus musihkkagilvu
Juohke jagi ovdanbuktet lávlut ja juoigit Suomas, Norggas ja Ruoŧas ođđa lávlagiid ja luđiid. Gilvvus leat guokte kategoriija; lávlun ja árbevirolaš luohti.
Gilvvus leat njeallje oasi. Vuos gilvalit guhtta lávlu ja guhtta juoigi goabbatge kategoriijas.
Go de leat jienastan, de álget gollefinálat. Guovttis goappáge kategoriijas gilvaleaba oktii vel, ja mii jienastat, dan gean háliidat vuoitin. Okta vuoiti juoiganoassái ja okta lávlunoassái.
Erenomáš vejolašvuohta
NRK Sámi prošeaktajođiheaddji Rávná Nystad ja Sámi musihkkafestivála SGP-buvttadeaddji Ol Johan Gaup leaba jo gearggus váldit vuostá lávlagiid ja luđiid.
Bovdehus lea rabas buohkaide, geat čállet lávlagiid beroškeahttá etnalaš duogážis. Dál lea erenoamáš vejolašvuohta searvat musihkkašuvvii, mii ovddida sámi artisttaid ja juigiid.
– Mo dal de manaš gilvvus, de lea dát vásáhus maid it báljo vásit eará sajis, muitala Ravna Nystad.
Lávlungilvu lea rabas buotlágan musihkkii. Sáhttá leat fiinna popšuoŋat, garrarocka, puddelrocka, luohti musihkain ja buot mii leaš daid gaskkas.
– Min mihttu lea láhčit sámi musihkkii stuorát saji almmolaš diđolašvuhtii ja riggudit Davviriikkaid musihkkaeallima sámi artisttaid bokte, muitala Ol Johan Gaup.
Nystad guovttos Gaupain leaba rámis maŋŋel go SGP 2022 manai nu bures. Artisttat nu go Aili ja Soá leat bovdejuvvon festiválaide ja čuojahuvvon stuorra rádiokanálain.
– Dál beassat miige návddašit dan fuomášumi maid SGP artisttat leat olahan iešguđet guovllus, lohká Nystad.
Sáhtát oažžut veahki
Gaup háliida vel muitalit ahte šuokŋa maid sáddet sisa ii dárbbaš leat áibbas gárvvis.
Teaksta ja melodiija gal berre dieđusge leat sajis, muhto manná bures sáddet sisa jus ii leat eambbo.
– Mii veahkehat artisttaid ja juoigiid buvttadit ja báddet ovdal Sámi Grand Prixa, son loahpaha.
Dieđit iežat dás: