Áhkku, eadni, ja áhkkut juiget seamma skearrus

– Eadni dat die munnje riŋgii gulaskuddandihtii ahte galgat go mii skearru ráhkadit fárrolagaid. Mii golmmas leat gal moddii ovdal loaiddastan smávit konsearttain. Nu ahte ieš in gal dán fuobmán.

Nie muitala Ida Márjá Varsi Solbakk

Son dat ovddasta bearraša nuoramus buolvva luohteskearrus, maid lea iežas áhkuin, Márgget Varsi, ja etniin Anne Lise Varsi bádden.

– Áhkku dieđusge máhttá eambbo luđiid go mun. Muhto gusto čájehuvvui ahte máhtan ieš eambbo luđiid go dihten. Go eadni juoigagođii dihto luođi, de fuobmájin ahte ieš maid máhtan dan.

Musihkkavideo maid

Sii gerge skearrubáddemis geassemánus, vaikko soitet moadde luođi báddet vel ođđasit.

– Muhto mii leat gullan ahte plánebehtet musihkkavideo báddet?

– Jo, mii galgat Čorgašii mannat goas dal de, ja dieppe báddet video skearru váldoluohtái, mas namma lea «Alit várri». Dieppe šaddat maiddái govvet olggošgova iežamet skearrui, muitala Ida Márjá Varsi Solbakk.

(Artihkal joatkašuvvá vuolábeale gova)

Juoigan- dahje luohte- politiija?

NRK deaivvada nuorra juigiin iežas geassebargosajis; Deanu leansmánnekantuvrras. Lea lagašbirrasis dovddus ahte Ida Márjá Varsi Solbakk lea čađaheamin politiijaallaskuvlaoahpu, Stavernis, Mátta-Norggas.

– Sámis han mis vissa leat iešguđetlágan eará «politiijat», ovdamearkka dihtii nugo giella- dahje juoiganpolitiija. Ja go juo don leat politijeaddjin šaddamin – ja oktanaga maiddái juoigi – don go leat dat nu beakkán «juoiganpolitiija»?

– Na, in mun gal dieđe justa dan dál. Jos dal háliidat mu gohčodit juoiganpolitiija, de áinnas, fástida Varsi Solbakk ja boagusta.

Gaskaboddosaš studio

Luođit leat báddejuvvon Fanasgiettis, Deanus. Gaskaboddosaš musihkkastudio ásahuvvui sámekultuvrra áŋgirušši ja ovddeš NSR jođiheaddji Regnor Solbakk-rohki vissui.

– Dat leat nu ollu olbmot geat barget ja veahkehit skearrubáddemii. Lei veadjemeahttun eará sadjái čohkket buot olbmuid bádden dihtii skearru, muhto Fanasgiettis lei vejolaš gos eanáš olbmot leat lahka.

Nie muitala John Trygve Solbakk, geas jurdda bođii báddet luohteskearru.

• Guovllas ja guldal oasáža luohteskearrubáddemis dás (olgguldas čujuhus)

Gudnijahttindihtii sámi ovddasmanni?

– Halvdan Nedrejord- ja Ámmun Johnskareng-guovttus dat leaba dien studio ásahan. Praktihkalaš sivat dat leat dien gaskaboddosaš studio duohken, lasiha Solbakk vel.

– NRK lea gullan ságaid ahte dat lea veahá gudnijahttindihtii iežat viellja, Regnor Solbakk-rohki. Muhto dat dáidet diekkár Solbakk-bearraša siskkáldas čiegus dieđut?

– Eat dal mii vuosttamužžan dasa leat bidjan deattu. Muhto oažžu gal datge dan dadjat. Loahpalaččat han dat šaddá maiddái gudnijahttimii sunnje, fástida John Trygve Solbakk mojunjálmmiin.

• Geahča maiddái: