Sihke sámegiella ja sámi báikenamat jávke go Yr ođasmahtii neahttasiidduid

Yr.no lea dálkediehtosiidu maid NRK ovttas Meteorologalaš instituhtain doaimmaha.

Gieskat leat ođasmahttán neahttasiiddu. Dain ođđa neahttasiidduin ii šat sáhte válljet sámegiela.

Sámi báikenamat leat maid jávkkan siiddus. Jus áiggut omd gávdnat dieđuid dálkki birra Guovdageainnus, de sáhtat ohcat sámegillii, muhto dárogiel báikenamma dušše ihtá.

Sámedikki ovddeš direktevra Rune Fjellheim reagere.

– Yr.no lea okta dain bivnnuheamos neahttasiidduin mat oba gávdnojit ge. Hui buorre lei go diet bálvalus lei sámegilli. Doppe ledje maid dievva hui báikkálaš báikenamat Sámis. Buot diet leat dál jávkan, lohká Fjellheim.

Son imašta manne ná leat vuoruhan.

– Vel čuoččuhit ahte lea šaddan buoret. Muhtumiidda gal soaitá, ja earáide fas ii. Die lea bálvalus mii galggašii doaibmat seamma bures Sámis go eará báikkiin, dadjá Fjellheim.

Fjellheim nu hárpmai go fuobmái ahte Yr lei sámegiela sihkkon daid ođđa neahttasiidduin ahte ráhkadii filmma maid juogadii Facebookas.

Son bijai Yr máinnusfilbmii sámi teavstta, mas kommenterii iežas oainnu áššis.

– Mun in diehtán eará, in leat šat dakkár posišuvnnas ahte sáhtán eará bargat, lohká Fjellheim.

Geahča filmma dás:

NRK šálloša

NRK teknologiijadirektevra Heidrun Reisæter lohká Yr gávdnot sámegillii, muhto soaitá váttis gávdnat dan. Dat lea oainnat báhcán daidda ovddeš siidduide.

– Šállošan go eat leat doarvái bures čilgen olbmuide mo gávdnat dan sámegillii dáid vahkuid maŋŋil go Yr ođasmahttojuvvui, lohká Reisæter.

Sii leat bargamin sámegielain, ja ođđa sámegiel jorgalus galgá gárvvis dán dálvvi. Das sáhttá dalle válljet davvisámegiela ja maiddái ohcat sámi báikenamaid.

Naba mo julev- ja máttasámegielain?

– Dál bargat ovdánahttit dan fálaldaga mii mis lea, ja dat lea davvisámegillii, čilge direktevra.

Ođđa Yr váldui adnui ovdalgo buot bálvalusat ledje sajis, ja sámegiella lea okta dain mat eai leat vel gárvásat. Sii áigot dál bidjat čujuhusa mo gávdnat sámegiela dassážii go buot lea nu mo galgá.

Fjellheim imašta manne sámegiella ii leat leamaš mielde jo álgoplánain.

– Manne ii sáhttán sámegiella leat sajis jo go almmuhedje ođđa siiddu, loahpaha Fjellheim.